Shillong, Lber, 26: Ka Khasi Jaiñtia Presbyterian Assembly (KJPA) Music Gospel Concert bad Food Fest kaba la ai kyrteng ‘Hosanna 2025’ kan sa long ha ka 29 tarik mynta u bnai ha madan Student, Jaïaw. Ha kane ka sngi, ka Food Fest kan sdang naduh ka por 11:00 baje mynstep haduh ban da kut ka Concert ka ban sdang ha ka por 4:00 baje janmiet.
U Convener jong ka Fund Raising Committee, Foreign Mission Board ka KJP Assembly u Rev. S. Diengngan u la ïathuh ba ka jingthmu jong kane ka Free Music Concert ka long kum shi bynta ban ai ka jingkyrshan bad pyntyllun ïa ki kam mishon shabar ri jong ka KJP Assembly.
Ha kane ka Gospel Concert, ki don ki nongrwai bad nongtem kiba don ki sap kyrpang ban rwai ïa ki jingrwai kiba kynsai bad ban pynkhih ïa ki mynsiem jong ki nongieit jingrwai kiba kynthup ïa ka Aroha Choir ba la ïalam da ka Kong Pauline Warjri, ka MANE Music Ministry, ka Sur na Nongkyndong-Lynshing, ka samla Kyntiewlin Mawphniang, u Bah Batlador Khongnoh bad ka kynhun.
Ha kane ka sngi yn sa ïashim bynta lang da ki Standing Choir jong ki saw tylli ki Synod, kata, ka Synod Mihngi, ka Synod Sepngi, ka Synod Pdeng bad Ri-Bhoi Synod.
Nalor kine, ha kane ka kynti yn sa ïadon lang ruh u nongïalap bad nongrwai niam uba la paw bha, u Benny Prasad bad ka kurim jong u, ka Zan Benny na Bengaluru.
