Shillong, Naiwieng 05: Ka Medulance, kaba long ka shlem ai jingshakri kyrkieh bapawkhmat, ka la shah pynkhamti ban pynïaid ïa ka EMRI-108 ha Meghalaya.
Ka Medulance kaba don ruh ïa ki kali Ambulance ba la pyndait ïa ka 5G, shen kan sa shimti ban pynïaid ïa ka jingai jingshakri sha ki paidbah nong shong shnong ka jylla Meghalaya kiba donkam ïa ka jingïarap kyrkieh ban pynpoi sha ki jaka ai jingsumar kiba don ha kylleng kane ka jylla Meghalaya, kaba ju jia khah ka jingtwa khyndew bad ka jingther jong u lapbah uba jur.
Kane ka kompeni ka la buh hakhmat ïa ka thong ban ïakhun pyrshah ïa ki jingeh ki ban sa wan na ka bynta ban ai ka jingshakri sha ki paidbah jong ka jylla Meghalaya baroh kawei. Da ka jingdon jong ka EDNA Enterprise kum ka kynhun kaba ïatreilang, ka la ïarap ruh haba ka sorkar ka la don hapdeng ka khia ka shon na ka jingiehnoh jong ka GVK EMRI ban pynïaid ïa ki Ambulance, kaba dang ïai bteng haduh mynta.
“Ka thong jong ka Medulance ka long ban pyntreikam ïa ka 5G kaba pyndait ha ki kali Ambulance, bad ban pyndait ïa ka GPS ha ki Ambulance. Kane ka long ban pynstet lyngba ka teknoloji ban ai jingïarap kyrkieh ïa ki paidbah kiba donkam jingsumar bad ban ïada ka jingim jong ki paidbah ha kane ka jylla. Ïa mynta ngi angnud ban pynlong ïa ka jylla Meghalaya ka jylla kaba nyngkong eh ban don ïa ka 5G smart Emergency Response,” ong u Co-Founder jong ka Medulance Healthcare u Mr. Pranav Bajaj.
Kane ka kompeni ka dei ruh kaba la ai jingshakri da ka jingkyrshan ka Sorkar Delhi, ban pynïaid ïa ki CATS 102 Services jin saw snem, kynthup ruh haba ka ri India ka la shah lynshop ha ka jingpang khlam COVID-19. Ka Medulance don ruh ïa ki nongai jinghikai kiba la don 35 snem ka jingbit ban pynïaid ïa ki ALS bad BLS, bad kiwei kiwei.
Ka Medulance ka la ai jingshakri ruh ïa ki Public Sector Undertakings (PSU) kum ka NTPC, ka COAL India, bad ïa ka Odisha Jail, kynthup ruh ka Stationed Ambulance services, ki Medical Center, ki Medical Professional bad ka Medical Care.
Ka kompeni ka la long kawei na ki kynhun kaba pynïaid ïa ka G20 Summit bad ka sorkar dang shen, da kaba ai jingshakri na ka bynta ki nongïashim bynta ha ka jingïalang G20.
