Shillong, Naitung 11: Kumba 92 tylli ki shnong ha jylla Meghalaya ki la pynkhreh ban long ki shnong ba nyngkong jong ka ri India (“first villages of India”).
Katkum ka jingïathuh jong ka Myntri ka Sorkar Pdeng kaba khmih ïa ka tnat Pla Tyngka ka Nirmala Sitharaman, kumba 92 tylli ki shnong ki la dep ban shah jied kum shi bynta na ka phase kaba ar haba ïadei bad ka Vibrant Village programme ka Sorkar Pdeng. Kine ki shnong ki don ha shilynter jong ka khappud bad ka ri Bangladesh.
“Ki 92 tylli ki shnong na Meghalaya kin sa long ki shnong ba nyngkong jong ka ri India,” ïathuh ka Sitharaman sha ki lad pathai khubor da kaba banjur ruh halor ki jingkheiñ kiba kongsan halor jong ki.
“Ngan sa leit ban jngoh ïa katto katne tylli ki shnong ha khappud ha kane ka jingwan jngoh jong nga, bad kane ka jingleit kan long ha ka sngi Saitjaiñ,” ka la ong da kaba pynpaw ruh ïa ka jingangnud jong ka ban ïasyllok bad kine ki shnong kiba don ha ki thaiñ khappud.
Ka Myntri ka tnat Pla Tyngka ka la ïathuh ruh ïa ki jingpyrshang jong ka sorkar ban wanrah ki kam pynroi ïa ki shnong kiba don ha ki thaiñ khappud bad kiwei ruh ki ri kum ka Myanmar, Tibet, China, bad Nepal.
Haba kylli la kadei ka jingshisha ba ka sorkar pdeng ka la pynsangeh noh ïa ka prokram border area development (BAD), ka Myntri Pla Tyngka ka la jubab da kaba ong, “Ngam tharai ba kane baroh kan long kumta. Ki jingïarap pisa sha ki thaiñ khappud ki dang ïaibteng. La pynïaid lang ïa ki napoh ka tnat ki Kam Pohïing bad ka tnat Ïada Ri.”
Ka la ong ba ka Vibrant Village programme mynta ka la long kaba ïar khambun haba ïadei bad ki kam pynroi sha kito ki shnong kiba don ha ki thaiñ khappud.
Kane ka prokram ka thmu ban pynïoh ïa ki lad kamai kajih, ban pynbha ki lad ki lynti ban pynïasoh, nangta ka pule puthi, ka lad ai jingsumar ne ka koit ka khiah, bad kiwei ki jingdonkam kiba kongsan sha ki shnong kiba im ba sah ha ki thaiñ khappud.
Ym kum ki border road program ba mynshwa, kane ka Vibrant Village Programme ka la kham pynleit jingmut khambun ha ki kam ïasyllok bad ki shnong, ban khmih ïa baroh ki kam pynroi kiba donkam ha kine ki shnong, ka la bynrap.
Haba kylli halor ki jingkiew ki mar ki mata ha kane ka thaiñ shatei lammihngi, ka Myntri ka la pynpaw ba ka dei na ka jingduna ban peit ïa ki jingkheiñ kiba lah rim, da kaba ong ba baroh ar ka dor jong ka jingdielang bad ka jingkiew ka dor die khutia ka la hiar bha ha baroh kawei ka ri. Kane ka rukom pyrkhat, ka la ong, ka la pynlah ïa ka Reserve Bank of India ban pyrkhat ïa ka jingpynhiar ka dor jong ka sut, kaba pyni ba ka jingkiew ki dor ki mur ki dang don hapoh ka jingpynïaid ka sorkar.
