Shillong Jymmang 27: U Lat ka Jylla Meghalaya u Phagu Chauhan ha ka sngi Thohdieng u la mynjur ïa ka komiti kaba kynthup ïa baroh ki seng saiñpyrthei ban ïathir ïatai sani halor ka jingpyntreikam ïa ka Reservation Roster System.
Katkum ka jingpyntip ba la pynmih da ka tnat Home (Political) jong ka Sorkar Jylla, ïa kane ka komiti yn khlieh da ka Myntri ka Sorkar Jylla ka Dr. M. Ampareen Lyngdoh kum ka Chairperson bad ki 11 ngut ki dkhot ki kynthup ïa u Zenith M. Sangma na ka All India Congress Committee (AITC), u Bah Himalaya M. Shangpliang na ka BJP, u Augstine Marak na ka Garo National Council (GNC), u Bah Methodius Dkhar na ka HSPDP, u Bah Ronnie V. Lyngdoh na ka Congress, u Bah Pyndapborthiaw Saibon na ka KHNAM, u Dr. W. R. Kharlukhi na ka NPP, u Bah Renikton Tongkhar na ka UDP, u Bah Ardent Miller Basaiawmoit na ka VPP, u Chief Secretary ka Jylla u Bah D. P. Wahlang bad u Commissioner & Secretary/Secretary jong ka tnat Personel & AR (B).
Ki kyndon treikam jong kane ka komiti ka long ban shim rai ha kaba ïadei bad ka jingpyntreikam ïa ka Reservation Roster bad ban phah ïa ka kaiphod sha ka Sorkar Jylla hapoh 15 sngi naduh ka sngi ba la thaw ïa kane ka komiti. Ka Komiti ka lah ruh ban pynrung ia kino kino ki dkhot ban ïashim bynta ha ki jingialang jong ka Komiti lada ka sngewdonkam.
Ka jingthaw jong ka Sorkar ïa kane ka Komiti ka long hadien ba ki nongialam jong ka VPP bad ka KHNAM ki la phet jyndat na ka jingialang jong baroh ki Seng Saiñpyrthei ba la pynlong da ka Sorkar Jylla ha ka 19 tarik mynta u bnai hadien ba ka jingïakren ka shu long beit thik tang ban pynshai halor ka jingpyntreikam ïa ka Roster System khlem da ktah ïa ka Reservation Policy. Kum ka jingpyrshah halor ka jingkyrngah ka Sorkar Meghalaya Democratic Alliance (MDA) ba la ïalam da ka National People’s Party (NPP) ban ïakren halor ka Reservation Policy ha kane ka jingialang, u President jong ka VPP u Bah Ardent Miller Basaiawmoit u la pynlong da ka jingshah jingit kaba khlem pud sngi naduh ka 23 tarik mynta u bnai ha Parking Lot kaba don markhap bad ka ophis Additional Secretariat, Shillong kaba la kynjoh mynta ka sngi Saitjaiñ sha ka sngi kaba san.
