Shillong, Jylliew 14: Ka Seng Samla Mawlai Pyllun ka la pynbna ban ai ïa ka khusnam Academic and Exceptional Talents Personality Award ha ka 12 tarik, Naitung, 2025 kum ka jingpynshlur ïa ki khynnah pule kiba pas bha bad ïa ki samla kiba ïoh khur takma ha ki rynsan ïakob bapher bapher kiba la long hapoh ka jylla, ha ka ri bad shabar ri ruh kumjuh.
Ha ka Academic Achievements Award ka seng samla kan sam ïa ka khusnam sha ki khynnah skul kiba ïoh 85 percent shaneng ha ka SSLC bad 80 percent shaneng ha ka HSSLC na ka bynta u snem 2025.
Ha ka Exceptional Talent Personality Award (2024-25) ka seng samla kan pynkup burom ïa ki samla kiba la mihkhmat ha ka jylla, ha ka ri bad shabar ri bad kiba la ïoh kheit ïa u soh ka jingtrei shitom ha ki sap bapher bapher, ha ka sap rwai bad ha ka sap ïalehkai sports nalor kiwei kiwei de ki jingjop.
U General Secretary ka Seng Samla Mawlai Pyllun Bah Edwigh Eddie Majaw u la pyntip ba ka tarik ba khatduh ban pynpoi ïa ki jingpyntip ka long ha ka 27 tarik Jylliew, 2025.
