Shillong, Nohprah, 01: Ka la mih ka jingïakynad kaba jur bha hapdeng ki paidbah kiba shong basah ha ka shnong Maikhuli, Ribhoi District, Meghalaya bad ki paidbah na ka shnong khappud ha Assam hadien ba ki runar ki bym lah ban tip ki la pyndam ïa ka jingthoh ha u maw tablet ba la thoh bniah ïa ka jingpyntrei ïa ka skhim MGNREGA ha ka Shnong Maikhuli da ka Sorkar Meghalaya.
Katkum ka jingtip ba la ïohlum, la ïathuh ba kane ka jingïakynad ka la jia naduh ka janmiet Sngi u Blei bad bteng haduh ka step Lah Sngi Blei.
Ïa ka jingïakynad la lah ban tem da ka jinghiar jong ki Magistrate bad ki Pulit na Ri Bhoi District ha ka step Lah Sngi U Blei namarba ki arliang mamla ki la ïa pynibor.
Ki nongshong shnong ka Maikhuli ki la ïathuh ba ki Pulit ka Jylla Assam ki la sakhi lang ha ka por ba ki runar ki la pyndam da ka rong iong ïa ki jingthoh ha ki ar tylli ki maw tablet ba la thoh ïa ka jingpyntrei ïa ka skhim MGNREGA ha ka shnong Maikhuli hynrei kim shym la leh eiei pynban ki la shu long tang ki nongpeit kai.
U Deputy Commissioner ka Ri Bhoi District u Abhilash Barwanwal, u la pynthikna ïa kane ka jingjia bad u la ïathuh ba u la phah ïa ki Magistrate bad ïa ki bor Pulit sha ka shnong Maikhuli ban tem ïa ki jingïakynad khnang ba kan nym ktah ïa ka shonguk shongsaiñ jong ki paidbah.
U la ong ruh ba kino kino briew kiba donkti ban thaw jingkulmar kin ym lait suk na ki kti jong ka aiñ namarba ki Pulit ki la pynlong ïa ka jingtohkit ban ïohkem ïa kiba donkti.
U la ïathuh ba u la ïakren ruh bad u Deputy Commissioner jong ka Kamrup District, Assam khnang ba kan ym mih kano kano ka jingïakynad ha ki shnong kiba don ha khappud namarba ka jingïapynbeit ïa u pud u sam ka dei ka kamram jong ka Sorkar Assam bad ka Sorkar Meghalaya ban ïa pynbeit.
“Kino kino kiba pyrshang ban pynngewthuh bakla ïa ki paidbah kin shah pyngngat ha ki kyndon jong ka aiñ,” u la ong.
Tang shu ïoh jingtip halor kane ka jingjia, ki nongialam bad ki dkhot ka FKJGP, North Khasi Hills District bad ka All Raid Marwet People Federation (ARMPF) ki la hiar sha ka shnong Maikhuli ban synran bad ai jingkyrshan lang ïa ki paidbah katba dang mih ka thma ktien bad ka jingïapynibor hapdeng ki paidbah ka shnong Maikhuli bad ki paidbah na ka jylla Assam.
