Shillong, K’ Lyngkot 21: Ka Meghalaya & Greater Shillong Progressive Hawkers & Street Vendors Association (MGSPHSVA) ha ka sngi Baar ka la rai ban pynlong da ka jingïakhih lada ka Provisional Town Vending Committee (PTVC) kam lah ban khot ïa ka jingïalang hapoh ar sngi.
Kane ka seng ki nongdie madan ki la dawa ruh ban weng ïa ka jingpynbna paidbah bad ka jingpyndam ïa baroh ki kam ba la leh da ka PTVC, ha kaba ki la kynnoh ba ka dei ka seng kaba beaiñ ha kaba ka la kam bad pynmih ïa ki thup kyrteng jong kiba shong die madan bad pynioh ruh ïa ka certificate jong kiba shong madan.
Halor kane ki la ong ba kane ka Electoral College jong kiba shong die madan ki dei ban jied ïa ki nongmihkhmat jong ka TVC kaba la thaw ha ka 13 tarik u Nohprah, 2022.
La ong ba kane ka la mih ruh ha kaba ïadei bad ka jingpynbna ban pynkynriah noh ïa kiba die madan napoh Khyndailad.
Ha ka shithi ba la phah sha ka chairperson jong ka PTVC, ka kong Biolin Pyrtuh ka la ong, “Ka la don ka jingpynkheiñ ha kaba ïadei bad kane bad ka jingpynmih ba la pynmih da ka PTVC. Ka seng ka la ong ruh ba u Lat ka jylla u la ïalam bakla ha kaba soi ïa ka jingpynbna bad ngi kyrmen ba ka High Court kan ym shah ïalam bakla halor kane. Ngi donkam ban khot ïa ka jingïalang jong ka PTVC kaba kyrkieh hapoh kine ki ar sngi naduh ba la ïoh ïa kane ka shithi ban ïasyllok halor ki phang kiba kongsan ba la pynpaw ha kane ka shithi bad kumjuh ruh ki shithi kiba la rim kiba la buh hakhmat ka PTVC.”
Ha kaba ïadei bad kane na ka liang jong ka, ka la kynnoh ba ka PTVC kam dei ka seng kaba la ithuh katkum ka aiñ ban pyntip ïa ki jingpynbna haba ïadei bad kiba shong die madan.
“Ma ngi kiba shong die madan jong ka Meghalaya ngi la mynjur ba ka jingai jaka kaba shipor na ka PTVC kan long na ka bynta ka jingai syrnot ha kaba ïadei bad kane ka kam bad kumjuh ruh ban pynkhreh ïa ka thup ki kyrteng jong kiba shong die madan. Kane ka dei ka thong kaba ka sorkar ka la tyrwa ha kaba kiba die madan ki la ong ba kin ïatreilang na ka bynta ka jingdonkam kaba shong aiñ,” ong ka Pyrtuh.
