Shillong, Naiwieng, 17: Khyndiat sngi hadien ba u Chief Executive Member (CEM) jong ka Khasi Hills Autonomous District Council (KHADC) Bah Pyniaid Sing Syiem u la hiar ban khynra naphang ia ki dukan bar jylla ha ka thaiñ Majai, ki 44 ngut ki nongkhaïi bar jylla kiba la leit tied ia ka jingkhang jong ka Ingbishar Meghalaya High Court namar ka jingbym ioh ia ka No objection Certificate (NoC) ha ka sngi thohdieng ki la leit ban pyndem hakhmat ka KHADC.
Kum ban shu pynkynmaw hangne, ka 5 tarik mynta u bnai u Bah Pyniaid Sing Syiem ryngkat bad u Executive Member Bah Joseph F. Lakadong ki la sha ka shnong Majai bad ha ka shnong Ichamati ban khynra naphang ïa ki dukan bar jylla ki bym biang ia ki kot ki sla kiba leh ia ki kam khaii pateng ha kine ki ar tylli ki shnong.
Kine ki nongkhaïi bar jylla kiba la wan ban pyndem ïalade ha khmat ka KHADC ki don kumba 12 ngut eiei kiba la kynthup lang ia ki Exporter bad ki nongshong dukan.
Ha ka jingiakren bad ka Batesi Tv u Bah Pyniaid Sing Syiem u la iathuh ba kine kidei ki 44 ngut ki nongkhaïi bar jylla kiba la leit ban tied ia ka jingkhang jong ka Iingbishar Meghalaya High Court hadien ba ki shym la ïoh satia ïa ka NoC na ka Hima Sohra na ka bynta ban pynthymmai ïa ki Licence jong ki.
Napdeng kine ki 44 ngut, 20 ngut ki dei ki Exporter katba 24 ngut ki dei ki nongkhaïi kiba kham rit kiba aplai na ka bynta ban ïoh pynthymmai ia ka License jong ki, hynrei namar ka jingbym biang ki kot ki sla kim shym la ioh satia.
U Bah Pyniaid u la ong ba kane ka jingwan jong ki ka long ba ki wan ban pyndem ialade hakhmat ka bor jong ka KHADC ryngkat ka jingkyrpad ia u CEM ban pynioh ia ka Trading License bad ki la aiti ruh da ka shithi ban ioh pynthymmai ia ka License ka jong ki.
U la iathuh ba ka KHADC, wat lada kine ki briew ki la wan ban kyrpad ruh ka hap ban peit katkum ka aiñ ym ban shu ai khumar ia ka License.
Halor ka jingthaw ia ka iew thymmai ha Khalipara da ki bar jylla ia kiba la suba ba ki dei kiba donkti ban dkhat jubor ia ka jingim jong u Bah Lurshai Hynñiewta ha ka shnong Ichamati, u Bah Pyniaid u la ong ba ki dang ap ia ka jingujor bad tang shu ioh pdiang ia ka jingujor ka District Council kan ym ailad ia ki bar jylla ba kin shu thaw ia ki iew katba ha ka jaka kaba ki mon namarba ka Ichamati ka dei kaba dang hap hapoh u pud u sam jong ka District Council.
