Shillong, Naitung 23: Ka Shillong Municipal Board ha ka sngi Balang ka la sdang ban sam ïa ki dukan jong kiba die madan hapoh jaka ïeng kali jong ka Meghalaya Urban Development Authority (MUDA) kaba don ha Khyndailad bad kat haduh ka por 5 baje janmied la poi haduh 240 ngut tam kiba la wan shim ïa ki slip dukan die madan.
Ha kane ka jingsam ïa ki jaka ba die jingdie la sdang ha ka por nohphai sngi da kaba pynkhalai nusip ïa kiba die madan ban jied hi ïa ki slip khnang ba kin ïoh ban sdang shong noh naduh ka Sngi Balang.
Ha shwa kane ka la don ruh ka jingpynbna na ka SMB ïa baroh kiba la don ïa ki certificate of vending ba kin kynriah noh na Khyndailad ha ka por 2.15 mynsngi shapoh ki dukan ba la pynkhreh ha MUDA.
Ha kane ka jingsam ïa ki dukan ka la mih pat kawei ka kynhun hapoh ka jingïalam ka Kong Angela Rngad kiba la pyrshah ïa ka jingpynkhalai nusip naba ki la ong ba ka Meghlaya High Court ka khlem bthah ïa kane ka bynta.
Katba u CEO ka SMB u P K. Boro u la pynshai ba kane ka jingpynkhalai nusip ka don ka jingthmu ban sam ïa ki dukan haba shit ba shai ban yn ym don ka jingshah liang bad ka shong beit ha la ka jong ka nusip, namar ym lah ban ai ïa kat kiba kwah ban shong shakhmat ne sha kano kano ka jaka kaba ki mon.
Katba ka nongai buit ka seng kiba die madan ka Kong Angela Rngad ka la pynpaw jingpyrshah ban ong ba ka Ïingbishar High Court ka khlem da la hukum ne bthah ban pynlong da ka khalai nusip hynrei ka SMB ka la pynkheiñ ïa ka aiñ.
Na ka liang ka MGSPHSVA ka la pynpaw ia ka jingbym lah ban pdiang ia kane ka rukom sam dukan madan ha MUDA. Halor kane ka nongaibuit jong ka seng Meghalaya and Greater Shillong Progressive Hawkers and Street Vendors Association (MGSPHSVA) ka Kong Angela Rngad ka la pynpaw ïa ka jingpyrshah halor ka rukom sam dukan die madan hapoh MUDA da ka Shillong Municipal Board ha ka sngi Balang, da kaba ong ba kane kadei ka jingshim kabu ïa ka rai jong ka Meghalaya High Court.
Haba kren bad ki lad pathai khubor ka la kynnoh ba ki dang don kiba la ai kyrteng hynrei ki khlem pat paw hapoh ka thup kyrteng kaba mynta ka sngi ban sam ïa ki dukan.
Haba ïadei bad ka jingpynbeit biang ïa ki jaka shong ka la ong ba la dep ban ïakren bad ïa kiba die mar barit kum u kwai dong bad kiwei dei ban ailad ban die harud surok bad tang ïa ki mar baheh dei ban die shapoh MUDA bad ka la kynnoh ruh ba kiba la don dukan ruh ki ïoh jaka ha jaka ïeng kali ha MUDA.
Na ka liang kiba khlem paw kyrteng ha ka thup kiba dei ban ïoh laisen ki la kynnoh ba ha kane ka kynti bun ki bar jylla ba ïoh laisen, hynrei la kynnoh ba bun ki Khasi pat ki duh laisen die madan
Shuh shuh kine kiba die madan ha Khyndailad kiba la dep ban aiti ïa ki kyrteng jong sha ka Shillong municipal board ki la pynpaw ïa ka jingbitar halor ka jingbym mih ki kyrteng bad ba ki khlem ïoh ïa ki COV.
Ïa kane ki la ïakren bad ki lad pathai khubor ha kaba ki la pynpaw ïa ka jingangud ban ïoh ïa ki laisen namarba ki la shong la palat 15 snem, hynrei ki khlem mih kyrteng, katba kiba die tang da ki bnai ki ïoh laisen bad kumjuh ruh ki bar jylla kiba la don ki dukan kiba sei ïa ki mar shabar ki leit ban shimti ïa ki dukan madan ha MUDA.
Kine kiba khlem pat ïoh laisen ki la pynpaw ba kim lah ban duh ïa kine ki dukan namarba ki la im jakpoh na kane ka kam khaïi.
Ki la rai ban ïakhun beit haduh ba kin da ïoh namar kumno ki bar jylla bad kiba dei ruh na ki jylla thaiñ shatei lammihngi, ki Mizo Naga ki ïoh CoV katba bun pat ki Khasi ki duh.
Lah ban pynkymaw ba ki don artylli ki seng die madan ha kaba kawei ka dei ka Meghalaya and Greater Shillong Progressive Hawkers and Street Vendors Association (MGSPHSVA) bad kawei pat dei ka Street Vendors Association bad ki dkhot jong baroh arseng kiba la ïoh ki number dukan ki la pdiang bad ai khublei ïa ka Sorkar ba ki la ïoh ïa kane ka jaka kaba ki la dawa, ym shah khrum ka MUDA.
Ha kawei ka liang kiba bun hi na kiba die madan ha Khyndailad khamtam kito kiba la don ïa ki certificate of vending ki la pynpaw ïa ka jingsngew kmen hadien ba ki la ïoh ïa ki dukan kumba ki la angnud ba mynta ki la lait na u slap ka lyer.
Watla don ruh kiba pynpaw ïa ka jingkhuslai la kin don ne em ki ba wan thied, hynrei ki la phah pat ka khubor sha ki paidbah ba kin kyrshan lem ïa ki da kaba wan ban thied ïa ki tiar na kane ka jaka naba ka dang long thymmai bad ba ki dang shu ia sdang ban shong naduh mynta ka Sngi Balang.
Ha kynta kaba janmied katkum ka jingïathuh da ki nongtrei ka SMB, la ong ba wat kito kiba la pynpaw ki jingpyrshah ki la wan ban pyndem toiñ hakhmat ki rukom pynïaid kam ka SMB ban shim ïa ki slip bad da ka jingwan jong ki, baroh kiba la wan shim slip ki la poi 240 ngut tam eiei.
