Shillong, K’lyngkot, 06: U Chief Executive Officer (CEO) ka North Eastern Security Service Private Limited (NESSPL) u Sarat Kalita u la pyndem toiñ hakhmat ki jingdawa jong ka Hynñiewtrep National Youth Front (HNYF) South East, Sohra Circle da kaba kular ban ym shim shuh ia ka bai registration kaba T. 15 hajar na ka bynta ki Security bad T. 20 hajar na ka bynta kiba bat ïa ka post Assistant Security Officer bad Supervisor.
Ha ka jingiakren bad ki lad pathai khubor hadien ka jingiakynduh ia u CEO ka NESSPL kaba la long ha ka sngi Baar, u nongaiktien jong ka HNYF, South East, Sohra Circle Bah Banjop Khongwir u la iathuh ba ha ka jingiakren u Kalita u la aiti ha ka seng ia ka kopi jong ka Trading License ba la ai da ka Khasi Hills Autonomous District Council (KHADC) bad u la kular ruh ban pynbna paidbah lyngba ka Advertisement lada don ki post kiba lait hapoh 10 sngi.
“Ngi la ai por ruh tang 20 sngi ia ki bor pyniaid jong ka North Eastern Security Service Private Limited ban weng kam ia ki briew ki bym dei ki trai jylla,” u la ong.
U Bah Khongwir u la ong ruh ba ka Seng kan sa pan jingpynshai na ka KHADC halor ka jingai Trading License sha ka NESSPL watla ki don ki Agency ba la pyniaid da ki trai ri trai muluk ban shimti ia ka kam ap pahara ha ki shlem pule bad ha ki ophis treikam.
“Ngi iohi ha ki social media ba ka KHADC ka ong ba kan ym ai Trading License shuh sha ki bar jylla lada ki trai jylla ki la lah ban trei ia ka kam hynrei mynta ka long da khongpong,” u la ong.
