Shillong, ïaïong, 09: U Dolloi jong ka Elaka Jowai u Bah Puramon Kynjing ha ka sngi Balang u la kular ban pyndam noh ïa ka No Objection Certificate (NOC) ba la ai na ka bynta ban shna ïa ka Coke Plant hapoh u pud u sam jong ka shnongWapungskur, ha East Jaiñtia Hills nalor kaba pynmih ruh ïa ka hukum sha u Waheh Shnong jong ka shnong Mookhep ban pyndam noh mardor ïa ka NOC ula ai sha ka Om Om Coke.
U Dolloi u la ai ïa kane ka jingkular ha ka jingïakynduh ïa ki nongïalam jong ka Dorbar Shnong Wapungskur ha ka jingïalang kaba la long ha ophis treikam jong u ha Jowai.
“Mynta ka sngi ngi la ïakynduh ïa u Dolloi jong ka Elaka Jowai bad ngi sngewkmen ba ngi la ïoh ïa ka jubab kaba shai ha kaba u la kular ïa ngi ba un sa phah da ka jingthoh sha u Waheh Shnong jong ka shnong Mookhep ba un pyndam noh mardor ïa ka NoC kaba u la ai ban shna ïa ka Coke Plant hapoh u pud u sam jong ka shnong Wapungskur. U la kular ruh ha ngi ha hapoh shi sngi ne ar sngi un sa phah da ka jingthoh sha ka tnat ba dei peit ban pyntip ba ïa ka NoC kaba u la ai ladep ban pyndam noh,” la ïathuh u Waheh Shnong jong ka Wapungskur Bah Postling Dkhar.
U la pyntip ba ka Dorbar Shnong ka la ïakynduh ruh ïa u Deputy Commissioner jong ka East Jaiñtia Hills ha ka 4 tarik, Ïaiong, bad mardor u la phah da ka jingthoh sha ka Meghalaya State Pollution Control Board ban pynsangeh noh ïa ka jingtyrwa ban shna ïa ka Coke Plant tad haduh ban da ïapynbeit shwa ïa ka kam.
“Hynrei, ngi kwah ban kren da kaba shai ba wat ynda ladep ïapynbeit ïa kane ka kam, ngin ym shah satia ban shna ïa kano kano ka Coke Plant hapoh u pud u sam jong ka shnong Wapungskur,” la ong u Bah Dkhar.
Da kaba pynpaw ba kam don satia kano kano ka jingkajia pud hapdeng ka shnong Mookhep bad ka shnong Wapungskur, u Bah Dkhar u la ong, “baroh ar tylli ki shnong ki don la u jong u pud u sam. Hynrei ka paw shai ba ka jaka ha kaba la tyrwa ban shna ïa ka Coke Plant ka dei kaba dang hap hapoh u pud u sam jong ka shnong Wapungskur.”
Shuh shuh u Waheh Shnong jong ka Wapungskur u la ïathuh ba u Chief Forest Officer (CFO) jong ka Jaiñtia Hills Autonomous District Council (JHADC) u la kular ïa ka kynhun ki nongïalam ka Dorbar Shnong ba ïa ka NoC bad ïa ka Clearance ba la ai da ka Council yn sa pyndam noh mardor namarba ka Om Om Coke kam shym la lah ban aiti ïa ki kit ki sla ba donkam.
Ki nongïalam ka Dorbar Shnong Wapungskur ki la aiti da ka jingthoh sha ka Meghalaya State Pollution Control Board (MSPCB), hadien ba ladep ai ha ka 7 tarik, Lber ïa ka Consent to Establish (CoE) sha ka Om Om Coke ban shna ïa ka Lam Coke Manufacturing Unit kaba tang uwei u atoskhana ha Thlakuru, Mookhep kaba long ka projek kaba kot T. 4.50 klur.
Ka CoE kan treikam tad haduh ka 28 tarik, Rymphang, 2026 hynrei lym kmta lah ban pyndam noh ne ban sospon. Ïa ka jingtreikam lah ban pynjlan, lada i donkam, tad haduh kata ka por ba ka karkhana ka la kloi ban pynmih ïa ki mar na ka bynta ban khaïi.
U Member Secretary jong ka MSPCB dang shen u la kular ïa ki nongïalam ka shnong Wapungskur ban sa pynlong ïa ka jingjurip shwa ban shim rai halor kane ka kam.
