Ribhoi, Lber 19 : Kum ka jingai burom bad ka jingpyrto ïa ki kam ba ki la shakri ha ka tnad Pulit hapoh ka jylla hadien ba ki la ioh ban kiew kyrdan, u Superintendent of Police ka Ri Bhoi, u Jagpal Singh Dhanoa mynta ka sngi u la pynkup burom ïa kine ki pulit da kaba pyndeng khlur hadien ba la ioh ban kiew kyrdan ha ka kam kaba ki trei kum ki pulit ka jylla.
Ïa kane ka jingpyndeng khlur ne ka jingleh burom la pynlong ha ka ophis u Superintendent of Police ka Ri Bhoi ha Nongpoh, ha kaba u Superintendent of Police ka Ri Bhoi, u Jagpal Singh Dhanoa u la shim bynta kum u kongsan ban pyndeng khlur halor kane ka jingkiew kyrdan kitei ki pulit ha ryngkat ka jingdon lang kiwei ki Pulit officer ka Ri Bhoi.
Nalor kito kiba la ioh ban kiew kyrdan, u Rubul Ali kum u Sub Inspector u la ioh kiew sha ka kuyrdan Inspector of Police, ki saw ngut ki head constable ba kynthup ïa u Mansih Chettri, Deepak Thapa, Amar Boro, and Suraj Gurung, ki la ioh ban kiew kyrdan sha ka kyrdan Sub Inspector bad ki Constable ba kynthup ïa u S. Arengh, I Narlong bad u C. Lyngdoh ki la ioh ba kiew kyrdan kum ki Head Constable.
Ha kane ka jingpyndeng khlur ne pynkup burom, u SP ka Ri Bhoi, u Jagpal Singh Dhanoa u la ai khublie kyrpang ïa ki bad u ai ruh ka jingkitbok kitrwiang ïa ki ba kin dang kiew shaphang ha ka kam kaba ki shakri ba ki dang lah shuh shuh ban ai ka jingshakri kaba paka tam na ka bynta ki paidbah.
