Shillong, Risaw, 14: Ki nongïalam jong ka Khasi Students Union (KSU) West Jaiñtia Hills District Unit ba la lamkhmat da u President u samla Laitphar Syngkrem ha ka Lah Sngi u Blei ki la aiti 17 tylli ki mat jingdawa ha ka District Selection Committee (DSC) ka West Jaiñtia Hills District ban dawa ba dei ban wanrah ïa ka thungkam thungkam kaba khuid ba suba namarba ka District Selection Committee ka dei ka shlem treikam kaba peit ïa ka thungkam thungjam ha ki tnat bapher bapher jong ka Sorkar Jylla ha ki District.
Ïa ka dorkhas ka seng ka la aiti ha ka Additional Deputy Commissioner jong ka West Jaiñtia Hills District.
Lyngba ka dorkhas ka KSU ka la pynsngew ïa ki 17 tylli ki mat kiba kynthup ba ka jingjied ïa ki dkhot jong ka DSC kim dei ban don liang ne kim dei ban shah liang bad ba ki dkhot jong ka DSC ki dei ban don noh ka kyrdan pule kaba biang.
Ka Seng ka la dawa ba dei ban paidbah ïa ki jingdon jingem jong ki dkhot ka DSC ba la shah thung bad ba ki nong aplai kam ki dei ban long ki trai shnong jong ka jylla Meghalaya bad kiba la nang ban kren ïa ka ktien Khasi ha la ki jong ki district.
Shuh shuh ka seng ka la dawa ba dei ban pynduh noh ïa ka thungkam Adhoc, Casual bad ka Contractual halor ka nongrim ba kine ki jait jingthungkam ki long kaba pyrshah ïa ka Guideline jong ka tnat Personnel and Administrative Reforms ka Sorkar Meghalaya.
“Dei ban pynduh shisyndon ïa ka personal interview ha ki post Grade B C bad D halor ka nongrim ba ka jingrung tuh lane thung kam bym khuid ka jur bha lyngba ka personal interview, ban pyni paidbah ïa ki marks jong ki nong aplai kam halor ka nongrim ban wanrah ïa ka jingkhuid jingsuba ha ka thungkam bad ruh khamtam ba ka DSC kan lait na ka jingshah kynnoh,” la dawa ka seng.
“Ha kaba ïadei bad ki roll number jong ki nongthep kam ka DCS kam dei satia ban kylla hapdeng ka jingthungkam. Ban ai da ki Carbon Copy jong ki OMR Sheet sha ki nongaplai kam, ban pyllait paidbah ïa ki answer key hadien ka eksamin hapoh ka por ba biang ba ki nongthep kam kin lah ban nujor bad aireng ïa ka answer key, ïa ka jingthep kam dei ban pyndep hapoh hynriew bnai naduh ba lah pynbna paidbah ïa ki post, ban ai ïa ka kaiphod lane Annual Report da ka DSC, ba ki question papers ne ki jingkylli kin hap long Confidential ban lait na ka jinglait tuh ki jingkylli,” la dawa shuh shuh ka seng.
“Ka DSC ka dei ban don ïa ka Grievances Cell khnang ba ki nongaplai kam kin dup lah ban ujor, ha ki snem ban sa wan ïa ki eksamin dei ban leh noh da ka CBT Computer Based Test, ban pynduh noh ïa ka eksamin internet services, ban buh ïa ki CCTV camera hapoh ki kamra thoh eksamin,” la bynrap ka KSU.
