Shillong, Rymphang, 13: Ka NEHU Non-teaching Staff Association (NEHUNSA) ha ka sngi Palei ka la phah da ka jingthoh sha u Myntri ka Sorkar Pdeng uba khmih ïa ka Ministry of Education ban weng noh kham kloi ïa ki jingeh hapoh ka skulbah NEHU.
U President ka NEHUNSA Dr Wandondor Rynjah Synrem, ha ka shithi u la pynpaw ba ka skulbah kam lah ban treikam khlem da don ka jingpynïaid kaba biang bad ka jingtreikam kaba beit jong ki ophis ka University. Ki nongtrei jong ka skulbah ki don ka bynta kaba kongsan bha ha ka jingpyntyllun ïa ki kam namarba dei ki nongtrei kiba pyndep ïa ka kamram ban pynrung kyrteng ïa ki samla pule, ka jingpyndep ïa ka registration jong ki samla pule, ka jingpynkhreh ïa ka baibam, ka jingpynïaid ïa ki eksamin bad kiwei kiwei. Ka kamram jong ki nongtrei hapoh ka skulbah la ka long ki nonghikai lane ki bym dei ki nonghikai la peit lut nadong shadong da ki nongtrei hapoh ophis.”
“Hynrei kumba la kdew ha ka shithi kaba mynshwa, ka jingdon jong ki nongtrei hapoh ophis ka la nang hiar haduh katta katta kaba lah ban ktah wat ïa ki kam jong ka skulbah. Ngi la kdew ruh ba ïa ki kam na ka bynta ki nongtrei hapoh ophis ladep pyntip paidbah hynrei haduh mynta ym pat lah satia ban thungkam. U Acting Vice-Chancellor uba mynta um shym khot ïa kano kano ka jingïalang jong ka Executive Council kaba donkam ban pyntip paidbah ïa ki kam kiba lait thylli ban pyndap. Kum ka kynhun jong kane ka skulbah, ngi kyrpad ba phin bthah ïa u Actiing Vice-Chancellor ban leh ïa kaba donkam khnang ban khanglad ïa kano kano ka jingïada na ka jingpynjot shuh shuh ïa ka jingthmu ba la seng ïa kane ka skulbah,” la bynrap u kyrwoh.
