Shillong, Nailar 01: U Myntri Rangbah ka jylla bad u National President ka National People’s Party (NPP) u la thoh sha u Myntri Rangbah ka Chhattisgarh Vishnu Deo Sai, ban kyntu ïa u ban wengnoh bad ban pynlait noh ïa ki 2 ngut ki sister ka Balang Catholic, ka Sister Vandana Francis bad Sister Preethy Mary, na Kerala.
Ha ka shithi ba la phah ha ka sngi Thohdieng da kaba kyrpad ia ka jingiatreilang bad ka jingkyrshan u Conrad ula ong ba u khmih lynti ba kan don ka jingtohkit kaba khlem shah liang khnang ban pynthikna ia ka jingshngain ka hok ki rit paid ha kane ka jylla bad ban wengnoh ruh ia ka case pyrshah ia kine ki arngut ki sister ba na Kerela- ka Sister Vandana Francis bad Sister Preethy Mary, kiba trei ha ka Fatima Hospital ha Agra, kiba la shah bat ha ki Pulit ka Chhatisgarh ha ka 26 tarik Naitung ha Durga Railway Station halor ki jingkynnoh lamler bad jingpynbor na ki kynhun shitniam.
“Ngi kyrmen ïa ka jingïatreilang jong phi khnang ba kine kiba shah kynnoh kin ïoh ka jingbishar kaba hok bad ba ka jingmane laitluid kan long kumba la buh hapoh ka riti synshar ka ri India,” ong u Conrad ha ka shithi.
Katkum ka shithi u ong ba kine ki sister kila synran ïa laingut ki kynthei na Chhattisgarh ban leit sha Agra hynrei u Travelling Ticker Examiner (TTE), ula kylli jingkylli ïa kine ki kynthei, kiba la batai ba kim don satia ïa ki ticket bad kila leit sha Agra da ka jingkyrpad ki sister.
La ïathuh ba une u TTE ula pyntip sha ki seng ba don ha kane ka thaiñ, kiba la kynnoh pat ïa kine ki sister ba ki pyrshang ban ïalam ïa kine ki kynthei bad pynkylla niam jubor.
U Conrad u la pynpaw ka jingngeit skhem ba kane ka jingjia ka dei ka kam thombor bad ka jingkynnoh lamler haba kyntu ïa u CM ka Chhattisgarh ba un tuklar lem bad pynthikna ïa ka jingbishar kaba hok.
Ha kawei ka liang ka Catholic Bishops’ Conference of India (CBCI) ba ka la phah ïa ka jingkyrpad sha u Myntri Rangbah Duh ka ri u Narendra Modi bad u Myntri kam Pohïing u Amit Shah ba kin tuklar lem ïa kane ka kam.
Shuh shuh u Myntri Rangbah ka jylla ula kyrpad ïa u Vishnu Deo Sai ba un pyrkhat lem ha ka ban weng noh ïa ka case ba la pynngat pyrshah ïa kine ki sister bad pynthikna ruh ïa ka jingtohkit ka bym shah liang ha kane ka kam nalor ka jingkyntu ban ïada ïa ka hok jong ki riewngeit niam ba ritpaid ha Chhattisgarh.
