Shillong, Naiwieng 16: Ka sap ha ka longbriew manbriew ka dei ka hok kaba kordor na U Blei, hynrei kumjuh ruh lah ban kyntiew bad pynbha lyngba ki jingai jinghikai ba bha bad ha ka pule puthi. Ha kane ka juk ba mynta, ki kam kyntiew ïa ki sap ki phong bad ki kam hikai ha ka jingaikam aijam ka la long ka bynta kaba kongsan ha ka kam pule kaba mynta, khamtam na ka bynta ki samla pule.
Ban buh ïa kane ka jingïohi jngai, ka Bellefonte Community College, Lumshyiap, ba la pynïaid da FMA Sisters of the Salesian Order, ha kaba la pynlong ïa ka Skill Development Exhibition hapoh ka ïew Lumshyiap ban pyni ïa ki sap jong ki samla pule kiba don ha ka shnong.
Naduh ba la seng mynta la kumba 4 snem, kane ka college ka la pynmih ïa ki samla pule kiba don ki sap bapher bapher kiba long ba kloi bad pynkhreh ban long kiba shaniah halade bad ban sdang ïa ki kam lajong. Ka Principal, ka Sister Helen Puweiñ, ka la ong ba kane ka jingpyninam ka ai ka jingshakri ban wanrah ka rynsan ban pynkupbor ïa ki samla lyngba ki sap ki phong bad kin lah ban leh bun ki kam ba kin kyntiew ïalade.
Lyngba kane ka jingpyninam, ki samla ki la ïoh ka lad ban pyni ïa kiba bun ki tiar ba la shna da ki kti, ki tiar ba pynitynnad ha la ki ïing ki sem, ki jaiñ bad fashion design, ki nuksa halor ka kam shet jingbam, bad ka kam digital media.
Ka kam kaba shai ba pynpaw ha kane ka jingpyninam ki long ki jaiñ ba la suh itynnad da ki samla pule, ha kaba bun na kiba wanjngohkai ki la pynpaw ba ki la long kum ki tiar kiba la pynmih da ki company ba la paw.
Ki nongshong shnong bad kiba shong dukan na Lumshyiap ki la wan ban jngoh ïa ki dukan, ïaphylliew jingmut bad ki samla pule, bad ki la pynpaw ki jingïaroh ïa ki kam ba ki la trei kiba la long kum ki jingshem thymmai.
Ki nonghikai ka college ki la pynpaw ba kum kane ka jingpyninam kaba don bynta lang bad ka shnong kan ïarap ban don ka jingpynïasoh ïa ka jingnang jingtip lyngba ki kamra skul bad ka jingim kaba shisha, bad kumjuh ruh ka pynshlur ïa ki samla pule ban shim ïa ka lad sengkam lajong bad ka jingnoh synniang ha ka ïoh ka kot ha ka shnong ka thaw.
U Rangbah Shnong (headman) u Bah A. K. Khongphai bad ki dkhot ka Lumshyiap Dorbar Shnong ki la wan ban ïashim bynta ha kane ka prokram bad ki la ïaroh ïa ki samla pule ïa ki kam ba ki la leh bad ki sap jong ki. Ki la pynshlur ruh kumjuh ïa ka college ban ïaibteng ban pynlong kum kine ki jait prokram na ka bynta ka jingmyntoi ki samla bad ka jingmyntoi ka shnong.
Katba ka Sister Helen ka la pynpaw ka jingai khublei ïa ka Dorbar Shnong Lumshyiap ha ka jingïaibteng jong ki bar kyrshan, ban ïatreilang bad ban pynpaw ka jingai khublei ïa ki nongtrei ka college halor ka jingtrei shitom ban ïalam lynti ïa ki samla pule.
Ka la ai khublei ïa ka Meghalaya State Skills Development Society (MSSDS) ka sorkar jylla ba ka la ai ka jingkyrshan bad ki lad na ka bynta ki samla pule ba kin ïoh ki jingmyntoi na kane ka jingai jinghikai.
Ka Bellefonte Community College ka dei ka jaka pule kaba shimet, ka bym dei kaba la ïoh ka jingïarap naka sorkar bad ka bym don bynta bad ki kam saiñ pyrthei, hynrei ka dei ka jaka pule kaba thmu ban pynkupbor ïa ki samla kiba duna ha ka ïoh ka kot, kyrpang ruh ki longkmie lyngba ki lad ba kin ïoh ki kam bad ban kyrshan ïalade lyngba ki prokram pule puthi. Kane ka college ka la shakri ruh kum ka model ban wanrah ka jingkylla ha ka pule puthi, ka jingshaniah halade bad jingkiew ka roi ka par ha kane ka thaiñ shatei lammihngi.
