Shillong, Naitung 01: Ban pyniaid ia ki jingiatreilang hapdeng ka ri Japan bad ri India khamtam ha ka jylla Meghalaya, ha ka Lah Sngi U Blei, u President ka Meghalaya Sports Association Bah John F. Kharshiing u la leit sha New Delhi ban iakynduh kyrpang ia u First Secretary (PR & Culture) ka Embassy jong ka ri Japan u Kobayashi Takashi bad ia ka Third Secretary ka Hakamata Maho.
Kane ka jingiakynduh ka long ban thaw ia ki lad iatreilang ha ki kam bapher bapher ha ka Sports, Tourism bad Culture.
Ha ka jingialang, ki ophisar ka Japan ki la ong, kumba long mynta ka ri Japan bad ka ri India ki la don ka jingiatreilang kaba jan hapdeng kiba bun ki kam ha kiba bun ki jylla ri India bad ki long kiba kloi ban nang pyniar ia kine ki jingtip sha ka jylla Meghalaya ban nang pyniajan ki rukom iadei lyngba ka Culture bad ka Cherry Blossom Festival ka long kawei na ki lad treikam lang, kumjuh ha ka Tourism bad ki kam ialehkai Sports bad khamtam eh ban thaw ia ki lad ki lynti ban pynshlur ia ka jingnang ban kren ia ka ktien Japanese kum shibynta ban plie ki lad iohkam iohjam sha ka ri Japan na ka bynta ki samla ka jylla Meghalaya.
Ki longheh ka ri Japan ki la mynjur ban pyniakynduh ia ki kynhun bapher bapher baroh ar liang halor kitei ki mat iakren ban pyniajan ka jingiatreilang kaba kham jan hapdeng ka ri Japan bad ka jylla Meghalaya India.
