Shillong, Nailar, 30: Ki dkhot jong ka Khasi Students Union, South West Khasi Hills District ha ka sngi Saitjaiñ ki la tur kyndit sha ka ophis jong u Syiem Hima Maharam kaba don ha Mawkyrwat ban dawa ïa u Syiem ba un khot mardor ïa ka Dorbar Hima bad ban pyndam noh ïa ka jingthmu ban ai sha ki shipai BSF ïa ka jaka jong ka Hima kaba don hajan ka Wah Mula, Ranikor Civil Sub-Division kaba ju pyndonkam da ki khun ki hajar ban rep ban riang mynta la bun bun snem.
Ha kane ka jingleit tur kyndit sha ophis jong u Syiem, la ïasnohkti lang da ki kynhun sengbhalang kiba kynthup ïa ka Federation of Khasi Jaiñtia and Garo People, ka Hynniewtrep Integrated Territorial Organisation, ka Hynniewtrep Youths Council, ka Hynniewtrep National Youth Front bad ka Hynniewtrep Achik National Movement.
Kumba lai kynta tam eiei u Syiem jong ka Hima Maharam, u Paiem Niandro Syiemiong um shym la mih satia na ka kamra treikam jong u katba ki dkhot sengbhalang ki dang pyrta ïa ki sur pynrem pyrshah ïa u bad ïa ka Executive Dorbar ka Hima Maharam.
Hadien kane na ka liang jong u Syiem u la khot ïakren ïa ki katto katne ngut ki nongïalam bad ha ka jingïakren bad ki lad pathai khubor hadien ka jingïakynduh ïa u Syiem, u President ka KSU South West Khasi Hills District u samla Forwardman Nongrem u la ong ba ka seng ryngkat kiwei de ki kynhun sengbhalang ki la kren da kaba shai ïa u Syiem ba kin ai por haduh ka 1 tarik, u Nailur, 2025 ba un lum ïa ka Special Executive Dorbar bad ban pynbna ba ka Hima ka la weng noh ïa ka jingthmu ban ai jaka ïa ka jaka rep jong ki khun ki hajar sha ki shipai BSF.
