Shillong, Nailur, 07: Ka Tourist Transporter Association of Assam (TTAA) ka la pynpaw ïa ka jingpyrshah kaba jur halor ka jingtyrwa ban khang noh ïa ki kali kamai Tourist na ka Jylla Assam ban kit ïa ki nongjngohkai pyrthei sha ki jaka jngohkai pyrthei kiba don ha ka jylla Meghalaya bad maham ruh lada pyntreikam ïa kane ka jingshah pyrkhing, ka United Body of Transporters of Assam (UBTA) ka lah ruh ban sangeh treikam ruh sha ka jylla Meghalaya.
“Lada ka All Khasi Meghalaya Tourist Taxi Association (AKMTTA) kan pyrkhing ïa ki kali Tourist na Assam ban rung sha ki jaka jngohkai pyrthei, ka United body of Transporters from Assam (Motor Paribahan Sanmilita Sewakarmi Mancha, Assam) kan hap ban pynsangeh noh baroh ki jingtreikam sha Meghalaya. Ha kata ka por, ïa ki kali na Meghalaya ruh kan ym shah ba kin leit buh ne leit shaw ïa ki nongleit jingleit sha Guwahati Railway Station ne Airport bad ka seng ruh kan ym shah ban kit ïa kali kit mar ba donkam sha Meghalaya kum ka nuksa, ki trok kit marbam, ki trok kit umphniang bad kiwei kiwei. Kane ka jingkhang pyrshah kan pynkylla ïa ka Meghalaya sha ka jaka bym don nong jngohkai pyrthei, ka jingmih kaba ym lah ban pdiang bad kaba pynsniew ïa baroh kiba don bynta,” ong ka TTAA ha u kyrwoh
Haba kynthoh ïa ka jingdawa jong ka AKMTA kum ka bym don nongrim bad kaba long tang na ka bynta jingmyntoi shimet, ka TTAA ka la ong, “kane ka jingdawa ka la pynmih ïa ka jingïakren namarba kine ki kali jngohkai pyrthei kiba la pynrung kyrteng ha Assam ki don ïa ki kot ki sla kiba biang, kynthup ïa ki kot ki sla jong ki lai tylli ki jylla na ka bynta ka Assam, Meghalaya, bad Arunachal Pradesh bad ruh kiba don wat ïa ka All India Permit bad kiba la noh synñiang sha ka jingai khajna kaba heh sha ka jylla Meghalaya Katkum ka aiñ, kine ki kali ki dei kiba la aibor ban kit ïa ki nongjngohkai pyrthei sha ki jaka bapher bapher ha ka jylla Meghalaya.”
Ka TTAA ka la pynpaw ruh ba ïa ka rukom leh jong ka jylla Sikkim yn ym lah ban leh kumjuh ha Meghalaya namar ka jingïapher ha ka riti synshar ka ri bad ha ka jinglong jingman ka jaka. Ka Article 371F bad ki jingma kiba ap ha khappud ki pynlong ïa ka Sikkim kum ka jaka kaba kyrpang.
“Ngi la ïohi ba u Balajied Jyrwa (All Khasi Meghalaya Tourist Taxi Association) u la dawa ïa ka rukom treikam kaba ïasyriem bad ka Sikkim. Hynrei, ka long kaba kongsan ban sngewthuh ba ka Sikkim ka dei ka khep kaba kyrpang na ka bynta ka Sorkar India namar ka jinglong jingman jong ka jaka bad namarba ka khappud ka ïatakhuh ba ka ri Bhutan, Nepal, and Tibet (China). Ka Article 371F jong ka riti synshar ka ri India ka ai ïa ki kyndon ba kyrpang na ka bynta ka Sikkim, kaba pynthikna ïa ka jingïada ïa ki hok jong ki trai ri trai muluk. Ka jingïoh jingïada ka Sikkim na ka ri India ha u snem 1950 bad ka jingpynïasoh ïa ka kum ka jylla India ha u snem 1975 ka pynpaw shuh shuh ïa ka kyrdan ba kyrpang jong ka, kaba pynlong ïa ka ban ym lah ban ïanujor bad kiwei pat ki jylla ha India, kynthup ïa ka Meghalaya,” la ong ka TTAA da kaba ai jingmut ba ka Meghalaya ka dei ban thaw ïa la ka jong ka polisi jngohkai pyrthei kaba burom ïa ka ain bad kaba pynshlur ïa ka jingïatreilang ha ka thain.
Ka seng ka sheptieng ba ka jingpyrkhing ka lah ban wanrah ïa ki jingpynthut ha ki kam jngohkai pyrthei, kumjuh kumba la jia ha Jammu & Kashmir hadien ka jingshah thombor kaba dang shen kaba pyndap ba ka kam jngohkai pyrthei sha ka jingsuk, ka jingïatreilang bad ka jingburom markylliang bad kano kano ka rukom jong ka jingïashun ne jingshah kyntait ka buh jingma ym tang ïa ka kam khaii hynrei ïa ka jingïatylli ha ka thaiñ.
Ka TTAA ka la kynthoh ba ki kali ba la pynrung kyrteng ha ka jylla Assam ki treikam hapoh ka All India Permit kaba mut ha baroh kawei ka ri India bad ka jingkhanglad ïa ka jingïaid jong ki kan pynkheiñ ïa ki kyndon pynïaid kali jong ka Sorkar Pdeng bad kan long ruh kum ka jingbym kheiñ snep ïa ki kam kamai kiba long katkum ka aiñ.
Ka seng ka la maham ba ka jingpynthut ïa kawei ka kjat jong ka Tourism Circuit kan pynthut ruh ïa ka Circuit baroh kawei, kaba lah ban wanrah ïa ka jingpynsangeh paidbah bad ka jingduhnong jong ki hajar ngut.
Ka TTAA ka la kyntu ïa ka Sorkar Meghalaya ban kiar na kaba shim ïa ka rai kaba tang shi liang kaba lah ban buh jingma ïa ka kam jngohkai pyrthei kaba dang kiew bha ha kane ka thaiñ bad ka la pynpaw ba “ka nam jong ka Meghalaya kum ka jaka pdiang sngewbha kan sa shah pynjot lada ki nongjngohkai pyrthei ki ïakynduh ïa ka jingshah lehbeiñ ne ki jingeh.”
Ka la pynpaw ruh ba ki nongpynïaid na ka jylla Assam ki la kyntiew ïa ka Meghalaya ha ki rynsan jong ka ri bad ka pyrthei bad ka jingkhanglad ïa ki ban ïohrung sha ki jaka jngohkai pyrthei kan khanglad ïa ka jingbei pisa kaba la neh da ki snem bad ka jingïatreilang.
Ki nongpynïaid ïa ki kam jngohkai pyrthei ki lah ban pynkylla noh lynti jong ki nongjngohkai sha kiwei pat ki jaka bad ka kam jngohkai pyrthei ha ka jylla Meghalaya kan khyllem jraiñ bad kan shim por da ki snem ban khie khlieh biang, la ong ka TTAA haba pynskhem ba ki rukom ba pynïapher ki ïaid pyrshah ïa ka mynsiem jong ka jingïalong kawei bad ka jingïatylli ha ka thaiñ Shatei Lam Mihngi.
