Shillong, Jylliew, 03: U MLA barim ka Mawlai Constituency u Bah Process T. Sawkmie u la pynpaw ba u la hap ban ïai buddien ïa ki skhim ki bym pat ïoh ïa kiba u la ai ha ka por por ba u dang long u MLA jong ka Constituency.
U la ong ba ki don ki shnong, ki skul, ki sports club bad ki seng Samla, kiba la pyntip sha u ïa ka jingbym pat ïoh ïa ki skhim ba la ai ha ka por jong u.
Napdeng kine, ka dei ka St. Francis D’Assisi Higher Secondary School kaba don ha Mawlai Kyntonmassar ka la pyntip sha u ba ka MLA skhim kaba u la mang naduh u snem 2022 kaba kot 5 lak tyngka ban pynkha ïa ki kamra klass jong ka skul, ka skul ka dang ïoh tang shiteng, kata, tang 2 lak 50 hajar tyngka hynrei ïa kaba sah pat kim pat ïoh satia haduh mynta.
Mar ïa ïoh jingtip halor kane, u Bah Sawkmie u la buddien bad mynta kane ka skul ka la ïoh lut ïa kaba pisa kaba sah baroh kaba u la aiti ïa ka shithi mang pisa ha ka 3 tarik, Jylliew, 2025 ha ka kti u Principal u Brother Sylvester Lugun.
Haba ïadei bad kane u Bah Sawkmie u la pynpaw ïa ka jingsngewsih bad ong ruh ba kum u briew uba ju ïai shakri ïa ki paidbah ka shnong un ym lah ban shu peit bad shu sngap ïa ka jingeh jong ki paidbah.
U Bah Sawkmie u la kyntu ruh ïa ka tnad PWD ba kan pyntreikam noh ïa ki kam, naba ki kontraktor ki ladep thep ïa ki Call Deposit na ka bynta ka jingpyntrei ïa ka project ha ka shnong Nongpdeng, Nonglum bad ha Umjaiur.
