Shillong, Lber, 27: U Myntri ka Sorkar Jylla uba khmih ïa ka tnat Bording u Abu Taher Mondal ha ka sngi Palei u la ong ba u la ïoh ïa ka jingkyrshan bapura na u Myntri Rangbah ka Jylla u Conrad K Sangma ban pynjanai ïa ka jingshakri jong ka Meghalaya Energy Corporation Limited (MeECL) bad ban pynbiang ïa ka jingpynmih bording ha ka jylla.
“Nga la ïoh ïa ka jingkyrshan kaba khraw na u Myntri Rangbah ka Jylla. Ngam shym la khmihlynti ba un kyrshan ïa ngi haduh katne bad dei na kata ka daw ba ngi ïatreilang ban ïohi ba ka jingtreikam jong ka MeECL kan kham janai bad ba ka jingsam bording, watla ka don ka jingduna hynrei la kham bha,”, ong u Mondal haba kren sha ki lad pathai khubor.
Haba pynpaw ba ka don ka jingïapher kaba khraw, u Mondal u la ong ba ki paidbah ka jylla ki la mad ïa ka jingpynlip bording haduh 7-9 kynta ha u snem 2023 hynrei mynta ka jingpynlip bording ka la long da ka por.
U Myntri shuh shuh u la ong ba kin sa don ki khem ba ki paidbah kin ïa mad jingeh namar ka jingpynlip bording da ka MePDCL na ka bynta ban maramot bad pyndep ïa ki kam ba dang ïaid shakhmat jong ka Revamped Distribution Sector Scheme (RDSS).
