Shillong, Jymmang, 17: Kumba 25 ngut ki mynder Bangladeshi ki la tur sha ka jingker sainar ha khappud ka India-Bangladesh bad pyrshang ban pynjot ruh ïa ka jingker sainar ha ka bynta ba don u mawpud (border pillar) BP. No. 1225/5-S hajan ka khyrdop No-2.
Halor kane ka jingjia, u Ganga Prasad Chandra jong ka C-Coy, 193rd Battalion ka tnat shipai BSF jong ka Border Outpost Ryngku, East Khasi Hills District u la ujor sha ki Pulit.
Katkum ka jingujor, la ïathuh ba kane ka la jia ha ka 14 tarik mynta u bnai ha ka por kumba 3 baje mynstep.
Wat hadien ka jingpynibor da ki shipai BSF kiba ap pahara ha khappud, ki mynder Bangladeshi ki la kawang da ki maw bad phet noh na katei ka jaka.
Hadien kane, ki shipai BSF kiba la pynlong ka jingtohkit ki la lap ba ki don ar jaka ki bynta jong ka jingker sainar ba la jot.
Ki Pulit kiba la ïoh jingtip kaba bniah na ki tnat syntiat, ha ka 13 tarik mynta u bnai ha ka por kumba 2:15 baje ki la pynlong ïa ka jingtalasi ïa ki kali ha surok Iew Dawki, West Jaiñtia Hills ha kaba ki la ïoh bat ïa kawei ka kali Maruti S-Presso kaba don ïa u nombar ML-05AB-2091 ba la ñiah da u Aibor Suting (30 snem) ba don lang bad kawei ka kynthei Bangladeshi ba shu rung beaiñ sha India kaba la tip kyrteng kum Sabina Yasmin (30 snem), katba ki dang thmu ban leit sha Shillong.
La pyntip ba kine ki arngut ki thmu ban leit sha Mumbai.
