Shillong, Nohprah, 12: Ka jingtyrwa jong ka Shree Cement Private Limited ban shna ïa ka karkhana pynmih dewbilat ka la wanrah pynban ka jingkad arliang jong ka shnong Daistong, Elaka Nongkhlieh, East Jaiñtia Hills District.
Kane ka la paw hadien ba ki nongkitkam shnong kiba ieng pyrshah halor ka jingthmu ban tei ïa ka karkhana pynmih dewbilat hapoh ka shnong Daistong ki la pynhiar shuki na ka kam Waheh Shnong ïa u Bah Himon Pajuh.
U Bah Himon Pajuh haba pynshai halor kane, u la ong ba u dang dei u Waheh Shnong ba pura jong ka shnong Daistong bad uba dang ïoh ïa ka jingithuh na ka Jaiñtia Hills Autonamous District Council (JHADC) bad na ka Elaka Nongkhlieh.
