Shillong, Risaw, 24: Ban pynsuk ïa ki paidbah bad ban kham pynjanai ïa ka jingai jingshikri, ka Sorkar Jylla ka la pynmih ïa ka jingpynbna ba la pynkha ïa ka Police Station ha Dakopgre, West Garo Hills District ïa kaba yn tip kum ka Dakopgre Police Station.
Da kaba pynkha ïa ka Dakopgre Police Station, ki shnong kiba hap hapoh u pud u sam jong kane ka Police Station ki dei kiba hap hapoh ka Tura Police Station.
U pud u sam jong ka Dakopgre Police Station u kynthup ïa ka Damalgre PS, South West Garo Hills District na shatei, ka Babadam OP ha mihngi, ka Tura PS na shathie bad ka Araimile PS na sepngi.
Shuh shuh ïa Sorkar ka la pynmih ïa ka jingpynbna ba la pynkha ïa ki Police Outpost ba thymmai. Kine ki Police Outpost ba thymmai ba la pynkha ki long ha Maweit, West Khasi Hills District ban tip kum ka Maweit Police Outpost, ha Ashugre, South Garo Hills District ban tip kum ka Ashugre Police Outpost bad ha Jadi, South Garo Hills District ban tip kum ka Jadi Police Outpost.
U pud u sam jong ka Maweit Police Outpost u long ka Nongstoin PS bad Mawshynrut PS na shatei, ka Mawkyrwat PS, South West Khasi Hills District na mihngi, ka Nonghyllam PS, South West Khasi Hills District na shathie bad ka Shallang PS na sepngi.
U pud u sam jong ka Ashugre Police Outpost u kynthup ïa ka shnong Digranggre kaba hap hapoh ka Sangknigre PS na shatei, ka shnong Deku kaba hap hapoh ka Chokpot PS na mihngi, ka shnong Rimrangpara kaba hap hapoh ka Dalu PS, West Garo Hills District na shathie bad ka shnong Sandong kaba hap hapoh ka Sangknigre PS na sepngi.
U pud u sam jong ka Jadi Police Outpost u kynthup ïa ka shnong Rongdong kaba hap hapoh ka Siju PS na shatei, ka shnong Darang Boldak kaba hap hapoh ka Nongalbibra PS na mihngi, ka shnong Pattalgittim kaba hap hapoh ka Nongalbibra PS na shatei bad ka wah Simsang bad ka shnong Rangram Pattal kiba hap hapoh ka Shallang PS, West Khasi Hills District na sepngi.
Ka Sorkar Jylla ka la pynbna ruh ba la pynkha ïa ka Police Outpost ba thymmai ha Monabari, South West Garo Hills District ban tip kum ka Monabari Police Outpost.
U pud u sam jong ka Monabari Police Outpost un kynthup ïa ka Kalapani Outpost kaba hap hapoh ka Mankachar PS (Assam) na shatei, ka Garodoba Operational Group Centre bad Betasing Outpost kaba hap hapoh ka Ampati PS na mihngi, kaAmpati PS/Mankachar PS (Assam) na shathie bad ka Mankachar PS (Assam) na sepngi.
