Shillong, Nailar, 08: Wat hadien ba ka District Magistrate jong ka East Khasi Hills District ka Kong Rosetta Mary Kurbah ka la pynjari da ka hukum hapoh ka Section 163 BNSS naduh ka 27 tarik, Jylliew, 2025 hynrei ki dang don pat ki Bus Night Super bad ki trok kit mar kiba pynkhein ïa ka hukum da kaba ïaid lyngba na ka surok Macabe Road ha ka shnong Demseiñïong, East Khasi Hills.
Katkum ka jingpynmih ïa ka hukum, ka District Magistrate ka la pyntip ba ka surok Maccabe Road ka dei kaba la shna ym ban ïaid da ki kali heh bad ka jingïaid jong ki kali heh kan pynjot ïa ka surok, kan pynjulor ïa ki sainar electrict, kan pynjulor ruh ïa ki lynti ïaid kjat bad ïa ki kynroh jong ki iing briew bad kaba lah ban buh jingma ïa ka jingim jong ki paidbah kiba ïaid lynti namar ka jingkhim jong ka surok bad nalor kata kan buh jingeh ruh khamtam haba don kino kino ki jingjia bakyrkieh.
Lyngba ki video ba la ïoh ring dur da u Bah Nicholas Kharnami ha ka step sngi Thohdieng la sakhi ba ki Bus Night Super bad ki trok kit mat ki dang ïai bteng ban ïaid lyngba na kane ka surok manla ka sngi.
