Shillong, Nailar, 06: Ki shipai Border Security Force (BSF) ka Meghalaya Frontier ki la pynskhem bad pynkhlaiñ ia ka jingpahara ha khappud hadien ba ka ri Bangladesh ka la pluh na ka daw ka jingiakynad kaba lam shaduh u pud ba ka Myntri Rangbahduh jong ka ri Bangladesh ka Sheik Hasina ka la hap ban hiar shuki bad wan phet mynta sha ri India.
Ha u kyrwoh ba la phah sha ki lad pathai khubor ha ka sngi Baar, u Inspector General (IG) jong ka tnat shipai BSF Meghalaya Frontier u Harbax Singh Dhilon u la pyntip ba ka jingpyrkhing bad ka jingpynkhlaiñ ia ka jingpahara ka long ban khanglad ia kano kano ka jingthmu jong ki mynder na ka ri Bangladesh ban wan prong tuh shapoh u pud u sam jong ka ri India lyngba ka khappud jong ka jylla Meghalaya.
Une u heh ophisar jong ka tnat shipai BSF ula pyntip ruh ba la phah ia ki Senior Officer bad ia ki Commander jong ka tnat shipai BSF sha khappud ban peitngor ia ka jinglong jingman bad ban pynthikna ba kan ym don kano kano ka jingiohrung tuh jong ki mynder na ka ri Bangladesh.
Shuh shuh u la pyntip ba baroh ki Land Customs Stations bad ki Integrated Check Posts kiba don ha shilynter ka khappud jong ka jylla Meghalaya ki la long kiba peitngor bha bad nalor kata ym shym la shah shuh ia ki paidbah ban iaid ban ieng ha shilynter ka khappud India bad ka Bangladesh hadien ba ka Sorkar Meghalaya ka la pynjari da ka Korphiw miet ha shilynter jong ka khappud.
Ki bor synshar bad ki Pulit jong ka West Jaiñtia Hills ki la iatreilang bad ka tnat shipai BSF ban pynkhlaiñ ia ka jingpeitngor bad la bthah ruh ia ki paidbah kiba shong basah ha khappud ba kin long kiba phikir bad kiba peitngor bha ioh mih kino kino ki jingjia kiba sngewsih.
Kum ban shu pyntip hangne, ba ki District Magistrate jong ka East Jaintia Hills bad ka West Jaintia Hills ki la pynmih ia ka hukum ban pynjari da ka korphiw miet hapoh ka kyndon aiñ 163 BNSS kaba la sdang naduh por 6:00 baje janmiet haduh ka por 6:00 baje mynstep haduh 200 meter na u Zero Line (International Border).
