Shillong, Jymmang, 24: Ka Krishi Vigyan Kendra (KVK), West Khasi Hills, Nongshillong kum shibynta ban pynkhreh ïa ka jingïalap ïa ka rep ka riang ha ka aiom lyiur (pre kharif campaign) kaba la jer kyrteng “Viksit Krishi Sankalp Abhiyan” ka la pynlong ïa ka jingïalang bad ki Sordar Shnong kiba hapoh Eastern West Khasi Hills bad West Khasi Hills District, ban pynsngew sha ki shaphang kane ka jingpynshai bad ban kyrpad ruh ïa ki ba kin wer bad lum ïa ki nongrep ha ki shnong jong ki.
Ha kane ka jingïalang, la pynsngewthuh ruh ïa ki lyngba ki power point presentation halor ka rukom treikam ka KVK bad ruh shaphang ka “Viksit Krishi Sankalp Abhiyan” kaba la wanrah da ka Sorkar India ha ka Ri baroh kawei.
Ïa kane ka jingïalap paidabh kaba 12 sngi kynthih yn sa plie ha ka 29 tarik mynta u bnai bad kan ïaid ter ter haduh ka 12 tarik, Jylliew da ka jingthmu ban pynsngewthuh ïa ki paid nongrep halor ki buit stad thymmai halor ka rep ka riang bad ri jingri bad kumjuh ruh ïa ki scheme bapher bapher jong ka Sorkar.
La wanrah ïa kane ka jingpynshai paidbah ha ka ri baroh kawei da ka Ministry of Agriculture and Farmers’ Welfare bad ka don jingthmu ban khring kumba shi klur haduh shi klur shiteng ki nongrep na ki 700 tylli ki district ha ka Ri lyngba ki 2000 tylli ki kynhun kiba kynthup ïa ki Scientists jong ka ICAR bad Krishi Vigyan Kendras (KVK) ha ryngkat ka tnat Agriculture jong ki Sorkar Jylla.
Kawei pa kawei ka kynhun kan pynlong 3 tylli ki awareness campaign ha man la ka District ban pynsngewthuh shaphang ka rep ka riang kaba katkum ka juk ba mynta bad ki lad ba bunjait ba ka Sorkar ka wanrah.
Ha Eastern West Khasi Hills bad West Khasi Hills Districts, yn pynlong ïa kane ka jingpynshai ha ki 108 tylli ki shnong lyngba ki 9 tylli ki kynhun kiba kynthup ïa ki Scientists na ICAR, Central Agricultural University bad Krishi Vigyan Kendra (KVK), na ka Department of Agriculture & Farmers’s Welfare, na ka Animal Husbandry & Veterinary Department, Department of Fisheries lem bad ki member jong ki FPO bad ki nongrep kiba lah paw.
