Shillong, Naiwieng 20 : Ka jingpynitynnad ïa ka Khyndailad ka la ïaid mynta sha khmat bad ka jingpynitynnad pura ïa ka, kan dei tad hadien ba la dep ban pynkynriah noh ïa ka Ïing Dorbar ka jylla sha ka jaka kaba thymmai kaba don ha Mawdiangdiang, pyntip u Symbud Myntri Rangbah ka Jylla, Bah Sniawbhalang Dhar.
Haba pyntip ïa kane ha ki lad pathai khubor ha kane ka sngi Palei, u Symbud Myntri Rangbah u la ong ruh ba kam don satia kano kano ka jingbuhteng lane pynsuki ïa kane ka jingpynitynad ïa ka Khyndailad. “Hynrei kumba phi tip bawat ïa ka Ïing Dorbar kaba rim ruh ym pat pynkynriah sha ka jaka ba thymmai. Kumta, tang shu dep pynkynriah ïa ka sha ka jaka ba thymmai ngin sa pynstet ïa ka jingpynitynnad ïa kane ka jaka baroh kawei,” bynrap biang u u Symbud Myntri Rangbah
U la ïathuh ruh ba mynta ïa ka Detailed Project Report (DPR) ruh ki dang pynbit pynbiang pura khamtam haba ïadei bad ka ïing dorbar kaba rim bad ruh ban wallam ïa ki jaka ïaid kjat kiba biang, ki khiew syntiew bad ruh ban siang bha ïa ki madan.
“La pynkhreh ïa ka DPR bad kadei kaba itynnad bha. Kumta ynda la dep put ynsa khot pat ïa ka tender. Ïa ka Ïing Dorbar ba rim yn sa pynpra noh katkum ka plan hynrei kaba dang hap pat ban shim rai khatduh, kane kan plie lad ban ïoh shna ïa ki jaka ïaid kjat kiba paka, baroh kine ki la don ha ka DPR,” ula bynrap biang.
Da kaba pynpaw ruh ïa ka jingsngewkhia halor ka jingud ki nongshong shnong ha ki jaka ba marjan, u Symbud Myntri Rangbah u la ong, “Katto katne na ki nongshong shnong ki la kyrpad ïa ngi ba lada ngi khang ai ka surok kan sa wanrah ka jingeh, kumta ïa mynta ngi dang ïa kren shwa ïa kane bad ynda la shai ki kam, ngin sa pynkhreh pat ban kylliang noh ïa ki jingsiang madan bad buh ruh ïa ki khiew syntiew ha shi lynter bad ïa ka por ruh yn sa buh hadien ba ka sorkar bad ki nongshong shnong ki la mynjur lang.”
Haba ïadei pat bad ka MTC Shopping Mall, u u Symbud Myntri Rangbah u la pyntip ba ka thong ban pyndep ïa kane ka jingtrei la buh ba kan dei ha u snem ban wan ha kaba 85-88 persen na ka kam ka la dep.
“Ka thong ban pyndep ka dei ha u snem ban wan. Kumta ngin ap haduh ynda la dei ka por ba la buh dei tad hangnta ngin sa lah ban ong ei ei,” u la bynrap biang.
Lah ban kdew hangne ba naduh ba ka sorkar ka khlem shah shuh ban die madan ha shi lynter ka surok Khyndailad ka la wanrah ka jingkylluid kaba khraw ïa ka thain Khyndailad baroh kawei khamtam eh na ka bynta ki paidbah kiba ïaid kjat na katei ka jaka man ka por.
