Babu Kular Khongjirem
Dang shen ka sorkar MDA-II ha Meghalaya hapoh ka jingīalam jong ka NPP ka la rai lyngba ka Cabinet Meeting ban pynkiew noh ia ka shuti Casual Leave (CL) na ka 15 sngi sha ka 30 sngi ha ka shi snem na ka bynta ki nongtrei sorkar bad ki public service undertaking (PSU) kiba treikam hapoh ka sorkar jylla.
Ha ki por kiba la dep, ka sorkar ka ai bad shah ban shim shuti (CL) tang hapoh 15 sngi ha ka shi snem ia kino kino ki nongtrei ba la siew tulop da ka sorkar. Lada ki shim palat nangta, kin hap ban leh da kiwei pat ki jait shuti katkum ka jingīapynbeit bad jingiasngewthuh jingmut lang bad ki Head jong kito ki Department ba ki trei ne ki Head jong ki institution. Katei ka shuti (CL) kan treikam lang kumjuh solonsar (uniform applicable) wat īa ki nonghikai skul kiba hap hapoh ki deficit system?
Ha kine ki shiphew snem tam mynta, kata, hadien ba la pyntreikam ia ka 5th Meghalaya Pay Commission, ka sorkar Meghalaya ka la pynkiew īa ka shuti kha khun (maternity leave) īa ki longkmie na ka 3 bnai sha ka 6 bnai. Wat īa ki longkpa (paternity leave) ruh ki īoh shuti lem haduh 15 sngi eiei ha ka por ba kha khun ka kmie khun jong ki. Hynrei, kaba lyngngoh pat ka long ba katei ka shuti kam treikam satia (not applicable) īa ki nonghikai skul hapoh ka Deficit System. Ka Office Memorandum jong ka sorkar Meghalaya ka la thoh shai ba katei ka Office Memorandum jong ka sorkar Meghalaya kam treikam (exemtion) īa ki nonghikai kiba hikai ha ki skul deficit watla ka Service Rule (2018) jong ki nonghikai ba īoh jingsiew na ka sorkar (Govt.aided schools) ki la thoh ban īoh lang kumjuh īa ki nonghikai ba la siew tulop lang ka sorkar. Kane ka long kum ka jingleh shiliang khmat (partiality) bad jingibein̈ ne jingleh beiñ (discrimination) na ka liang ka sorkar īa ki nonghikai hapoh ka deficit system. Tip kane ka CL ba 30 sngi ba ka sorkar ka la rai mynta kan treikam (applicable) neem īa ki nonghikai kiba hap hapoh deficit skul. Ka official notification jong ka sorkar ka dei ban thoh shai dar ba ka kynthup lang (including) īa ki deficit skul, lym kumta, ki bor pynīaid skul kin artatien ban pyntreikam īa katei ka rai.
Ka rai jong ka sorkar ka kren shai tang īa ki nongtrei kiba kwah shim shuti kin īoh shuti pahuh ei haduh 30 sngi ha ka shi snem. Hynrei, īa kito pat kiba minot thop ban leit trei khlem shim shuti, kumno ka sorkar kan pyrkhat halor jong ki? Ha ka jingshisha, lada ki nongtrei kin wan tista khlem pep sha ki kam ba ki trei, ka dei ruh ban ai jingīaroh, ai mynsiem, ai khusnam ne ai award kum ka jingpynshlur (incentives) khnang ba kan long ruh ka nongmuna īa kiwei ki nongtrei.
Ka sorkar ka dei ban pyrkhat ruh īa ki riew minot ba wan tista (regular) sha ka kam jong ki namar lada ki wan tista, kan long ruh ka jingmyntoi ym tang īa kato ka office ba ki trei hynrei ia ka roi ka por jong ka jylla bad ka ri hi baroh kawei.
