Shillong, Jymmang, 14: Ki Myntri jong ka San Kur Khatwei Kur jong ka Raid Mylliem ki la pynbna ba mynta u snem 2025 kin ym lah ban lehniam kumba la ju leh manla u snem.
Ka Raid Mylliem ka ju pynlong ïa ka jinglehniam ar sien shisnem, kawei ka dei ka jinglehniam ha Mawnarian bad Lum Shyllong kaba ju pyndep ha kajuh ka sngi bad kawei pat ka dei ka jinglehniam ha Iewduh hynrei mynta u snem la hap ban pynsangeh noh ïa baroh kine ki jinglehniam.
Haba ïa kren bad ka Batesi TV, u Myntri Sohtun bad u Myntri Kharkongor ki la ong ba ka daw jong ka jingbym ïoh ban pyndep ïa ka niam ka rukom ka dei namar ka jingpynthut jong ki ar ngut ki briew kata u Bah Kyrshon Marbaniang uba bat kum u Lyngdoh jong ka Raid Mylliem bad u Bah Deming Nongkhlaw.
Ki la ïathuh ba kine ar ngut ki la ïalam da ki paidbhur ha ka Dorbar pyrkhat kam jong ki San kur Khatwei Kur kaba la long ha ka 25 tarik, Ïaiong 2025 bad ki la rah ruh da ki tiar pynmynsaw bad na kane ka jingleh jong ki ka la poi shaduh u pud ba ym lah shuh ban ïakren pynbeit ban pyndep ïa ka niam.
Ki Myntri jong ka San Kur Khatwei ki la ong ba kine ki ar ngut kin hap shim ïa ka jingkitkhlieh halor ka jingbym lah ban pyndep ïa ka niam ka rukom.
Shuh shuh ki la kyrpad ïa ki paidbah ba kim dei ban sngew khohñïoh ïa ka jingbym lah ban pyndep ïa ka niam.
