Shillong, K’lyngkot, 05: Ka Khun Hynniewtrep National Awakening Movement (KHNAM) ha ka sngi Saitjaiñ ka la lum lang ïa ki kyrtong kiba ka la ai tiket ban pynsngewthuh ïa ki nongrim treikam jong ka party bad ban pynkohnguh da ka ‘jingïatiplem’ ba kin ym mih noh na ka party ynda ki la jop ïa ka elekshon MDC sha ka Khasi Hills Autonomous District Council ka ban sa long ha ka 21 tarik Rymphang, 2025.
Ka KHNAM ka la shim ïa kane ka sienjam namarba ka jingbym treikam jong ka aiñ kyntiap seng ha ki Autonomous District Council ha kaba ki MDC ki ïohlad ban ryngkang katba mon na kawei ka seng saiñpyrthei sha kawei pat ka seng saiñpyrthei na ka bynta ka jingmyntoi shimet.
Ha ka jingïakren bad ki lad pathai khubor hadien ba la wai ka jingïalang, u General Secretary jong ka KHNAM u Bah James M.A Neng u la ong, “naduh ba la pynbna ïa ka thup kyrteng kaba nyngkong, kane ka dei ka sien kaba nyngkong eh ban lum lang ïa ki kyrtong kiba ka party ka la ibit ban ai tiket na ka bynta ban pynïakhun ïa ka elekshon MDC, 2025.”
“Ngi la ïohlad ban ïaphylliew jingmut bad ki kyrtong halor ka nongrim ba ngi ieng ha kane ka elekshon MDC kan long beit tang kawei ka thong ynda ki la leit sha ki paidbah,” u la ong haba pyntip ruh ba ki kyrtong kiba ka party ka la ai tiket ki dang dei ki riewthymmai.
“Ha ka jingsngew jong ngi, ka elekshon MDC ka dei kaba kham kongsan ban ïa kiwei kiwei ki elekshon ka ktah beit ïa ka ri bad ka jaidbynriew jong ngi bad ka ktah beit ïa ki paradoh parasnam jong ngi namarba dei lyngba ka District ngi lah ban pynneh pynsah ïa ka jinglong bakyrpang ïa ka jaidbynriew jong ngi. Ka nongrim jong ngi, ka long ban kyntiew, ban ïalam bad ban ïada ïa ka ri bad ka jaidbynriew,” la pynpaw u Bah Neng.
U la ïathuh ba ki kyrtong kiba ka party ka la ai tiket ki long kiba khih kiba ksar bha bad kiba la sngewthuh bha bad kiba la don ka jingnang jingtip bad kiba trei shitom.
“Ngi don ka jingkyrmen kaba skhem ha kine ki kytong ba ha une u snem 2025 ngin ïoh ïa ki nongmihkhmat sha ka KHADC,” la pynpaw shuh shuh u Bah Neng.
Shuh shuh u la ïathuh ba ka KHNAM kan sa pynlong ruh ïa ka jingshim smai bad ka jingkular na ka bynta ki kyrtong hakhmat u durmot jong ki riewkhraw jong ka jylla ba kin trei ïa ka hok bad na ka bynta ka jingmyntoi jong ka ri bad ka jaidbynriew.
“Ïa ka sngi bad ka por ngin sa pynbeit namarba ki dang don sa katto katne ki kyrtong ba ngin sa pynbna ha ka thup kyrteng kaba ar ïa kiba ngi dang peit bniah,” la ïathuh u General Secretary ka KHNAM.
Kum ban shu pynkynmaw, ka KHNAM ka ladep pynbna ïa ka thup kyrteng banyngkong jong ki phra ngut ki kyrtong.
U la pyntip ruh ki dang don sa 10 ngut kiba la pan tiket ïa kiba ka State Election Commitee jong ka Party ka dang bishar bniah bad ynda ka Committee ka la phah ïa ka kyrteng sha ka Central Executive Committee ka party kan sa shim ïa ka rai kaba khatduh.
