Shillong, Nailur, 16: U Myntri Rangbah ka Jylla u Conrad K Sangma u la pynksan ïa ka jingpynneh ïa u MLA jong ka Williamnagar Constituency u Marcuise N Marak ha ka Kynhun Myntri da kaba pynpaw ba u dei uba la kham rim bad uba la don la bun bun snem ha ka party.
“U Marcuise Marak u dei u dkhot uba la kham rangbah bha jong ka party. U la don bad ka party la slem bha bad kumjuh ruh na ka histori, wat shwa ban seng ïa ka party (NPP), wat ha ka NCP ruh, u la don beit ha ka party la slem bha. Ha kajuh ka por, u dei ruh u Working President jong ka party jong ngi. Da kaba buh jingmut ïa kine ki daw, nga sngewdei ba u Marcuise Marak u dang dei ban bteng bad halor kata, nga la shim ïa ka rai jongnga,” la ong u Sangma ha ki lad khubor ha ka sngi Baar.
Ha kaba ïadei bad ka jingshah pynhap noh jong kiwei pat ki MLA na NPP ba kynthup ïa u Abu Taher Mondal bad ka Dr. Ampareen Lyngdoh, u Sangma u la ong ba ka party ka la ailad ban mihkhmat ïa ki jaidbynriew ki bym dei riewlum bad ïa ki kynthei ha ka wat kaba nyngkong jong ka samoi treikam jong ka Kynhun Myntri.
“Ki la ïoh ban don bynta ha ka wat banyngkong, kumta ka pawshai ba ha kajuh ka por ki don ki nongïalam kiba la rangbah bha ha ka party kiba la don ryngkat bad ngi la slem bha. Kumta ha ka wat kaba ar, ngi la rai ban ailad katkum kata. Ki la don ka jingmihkhmat jong ki ha ka wat kaba nyngkong. Kam dei kaba ngim shym la ai jaka satia na ki bym dei ki jaitbynriew riewlum bad ki kynthei ha ka imlang sahlang. Ngi la ailad ïa ki ban mihkhmat ha ka wat banyngkong bad ha ka wat kaba ar mynta ngi la rai ban ailad sa ïa kiwei ruh,” u la pynksan.
U Myntri Rangbah u la pynskhem ba ka rai jong u ban pynkylla ïa ka Kynhun Myntri jong u ka long ban pynryntih ïa ka jingmihkhmat bad ban ailad ïa kiwei kiwei ki kynhun bad ki riewshimet ha ka party.
Ki Myntri kiba la shah pynhiar shuki na ka Kynhun Myntri ki long u Bah Comingone Ymbon, ka Dr. Ampareen Lyngdoh, u Rakkam A. Sangma, u Abu Taher Mondal, u Bah Paul Lyngdoh bad u Bah Kyrmen Shylla na ka UDP, u Bah Shakliar Warjri na ka HSPDP bad u Bah Alexander L. Hek na ka BJP.
