Shillong, Nailur, 23: U State Working President jong ka NPP uba dei ruh u Myntri Sorkar u Marcuise N Marak u la ïaroh ïa u Myntri Rangbah ka jylla u Conrad K Sangma halor ka jinglah jong u ban pynneh ïa ka jingïaryngkat ha ka jingmihkhmat, da kaba ai ïa ka bynta kaba kongsan tam ïa baroh ki paralok kiba ïatreilang ha ka sorkar Meghalaya Democratic Alliance (MDA).
Ha ka jingïakren bad ki lad pathai khubor ha ka sngi Baar, u Marak u la kdew ba watla ka NPP ka don 33 ngut ki MLA hynrei u Myntri Rangbah u la bat ïa ka jingkular jong u ban pynthikna ïa ka jingmihkhmat na ka bynta ki seng kiba kham rit ha ka Sorkar kaba kynthup ïa ka Hill State People’s Democratic Party (HSPDP) bad ka United Democratic Party (UDP).
“Da kaba buh ïa kane ha ka jingmut, nga ong haoid ka dei ka jingleh kaba hok,” u la ong haba bynrap “baroh ki tip ba ka Sorkar synrop ka donkam ban ïai bteng bad ban pynïadei. Da kaba pyrkhat ïa kata, watla ka la don khyndiat eh ïa kane ka jingjia hynrei mynta la lah ban pynbeit ïa ki jingeh.”
Katkum ka jingong jong u, kane ka jingpynïabiang ka la ïarap ban wanrah ïa ka jingïatreilang bad ki paralok kiba ïatreilang ha ka kynhun MDA.
U Marak u la pyntip ruh ba u Myntri Rangbah ka Jylla u la bthah ïa baroh ki MLA na ki party kiba don ha ka liang synshar ba kin shim ïa ka jinglong trai halor ki Constituency jong ki da kaba treikam kum ki Myntri Rangbah.
“Namarkata, kam don jingkylli ïa ka jingbymhun ne kaei kaei namarba u dang lah ban peit ïa ka Constituency jong u da ka jingkitkhlieh kaba pura. Ngi burom ïa ki la ka long ha kano kano kaba dur kaba ki kyrpad bad ngi mynjur ïa kata. Kumta kam don jingkylli ïa ka jingbymhun ne kano kano ka daw,” u la pynpaw.
Ha kaba ïadei bad ka jingmihkhmat ha ka Kynhun Myntri, u nongïalam ka NPP u la kdew ba u Myntri Rangbah ka jylla u la shim ïa ka rai haba pyrkhat ïa ka jingdon ki MLA na Ri Bhoi District. Da ka jingdon jong ki saw ngut ki MLA na ka District, u Myntri Rangbah ka jylla u la pynthikna ba dei ban sngap ruh ïa ka sur jong ki bad ban pynbiang ïa ki jingdonkam jong ki.
