Shillong, Jymmang, 16: U Lat ka Jylla CH Vijayashankar ha ka sngi Thohdieng u la pynkup burom ïa ki san ngut ki khynnah skul kiba la pas ha ka kyrdan banyngkong eh ha ka Secondary School Leaving Certificate (SSLC) bad Higher Secondary School Leaving Certificate (HSSLC).
U Lat u la aiti ruh ïa ki syrnot bad ïa ki jingai sngewbha ïa ki san ngut ki khynnah skul kiba kynthup ïa ka ka Idawanplishisha Swer -1st Position, HSSLC (Arts) na St. Edmund’s HSS, u Saptarshi Bhattacharjee -1st Position, HSSLC (Science) na Laban Bengali Boys’ HSS, ka Disha Chokoni -1st Position, HSSLC (Commerce) na St. Anthony’s HSS, ka Leisha Agarwal -1st Position, SSLC na St. Margaret’s HSS bad ka Avila Kathrene P. Lyngdoh -1st Position, SSLC na North Liberty HSS, Jowai.
U Lat u la ai khublei ïa ki khynnah skul kiba la jop bha bad pas bha ha ka jingpule bad u la ai mynsiem ïa ki ban dang long shuh shuh kiba minot. “Bun na phi, phin sa ïaid shakhmat ban long ki doktor, engineer, ki riewstad, bad ki riewshemphang ki ban pynlong ïa ka jylla Meghalaya bad ka jaidbynriew ka ban sngew sarong,” u la ong.
U la kdew kyrpang ïa ki khynnah skul na ki jaka riewlum bad ki jaka ba kyndong kiba la jop ïa ki jingeh ban mih kum ki nongjop, da kaba pynpaw ruh ba ka jingjop jong ki ka la long kum ka jingai mynsiem ïa kiwei pat.
U Lat u la ïaroh ruh ïa ka jingtrei shitom jong ka MBOSE ha kaba pynneh ïa ka jinglong hok ha kaba pynïaid ïa ka eksamin. U la pynshlur ïa ka Board bad ki jaka pule ban kham pynïadei kham jan bad ka National Education Policy (NEP) 2020, da kaba ai ïa ka jingpule ba pura, ka jingpynroi ïa ki sap, bad ka jinglong jingman ha ka jingai ïa ki jinghikai, ban pynthikna ba yn ym don ki khynnah ban shah iehnoh.
Ha ka prokram ba la long ha Durbar Hall la pynshongkun da ka jingpyni kolshor bad ka jingshad tynrai jong ki nong Sikkim ba la ai jingkyrshan da ka Indian Council for Cultural Relations (ICCR), Shillong. La pyni ruh ïa ka phlim lyngkot kaba pyni ïa ki jingsdang bad ki jingjop jong ka MBOSE.
Haba kren ha kane ka sngi, u Chairman jong ka MBOSE u CP Marak u la ai khublei ïa ki khynnah skul bad u la ong ba ka ka jingjop ha ka jingpule ka dei ka jingtrei shitom ruh jong ki nonghikai, ki kmie ki kpa bad ki jaka pule.
U la ïaiban ba ka jingtreikam jong ka MBOSE kan long kaba khuid bad kaba shai, ban thaw thymmai bad ban pynkylla katkum ka NEP 2020.
La sam ruh ïa ki kot ki sla bad ka khusnam pisa sha ki samla pule da ki ophisar.
Khyndiat ngut ki samla pule ruh ki la ai jingkren lyngkot ban pynpaw ïa ki jingïaid lynti, ki jingangnud bad ka jingsngewnguh jong ki ïa ka skul, ïa ki kmie ki kpa bad ïa ka tnad pule puthi.
Ha kane ka sngi, la sakhi lang da u Director ka MBoSE Bah M. Marbaniang uba la ban jur ïa ka jingdonkam ban ai jinghikai pyntbit shuh shuh ïa ki nonghikai, ka jinghikai ba kyrpang bad ka jingbei pisa na ka bynta ka jingpyndonkam ïa ka Digital khamtam ha ki jaka ba duna ka jingshakri.
Kane ka jingïalang ka long ruh kum ka jingrakhe ïa ka sngi ïoh jylla bapura jong ka Sikkim.
