Shillong, Jylliew, 20: Ka Iingbishar Meghalaya High Court ha ka sngi Thohdieng ka la pynkut noh ka jingujor halor ka jingpynmih hukum ba dang shen da ka Khasi Hills Autonomous District (KHADC) ha kaba ïadei bad ka jingpynlong ïa ka elekshon jied Sordar jong ka Shnat raid Tynring, ka Hima Khyrim.
Ka hukum ba la pynmih da u CEM ka KHADC Bah S. Rynjah ha ka 11 tarik Jylliew, ka ong, “………..ka Executive Committee kaba la bishar bniah ïa ka jingpynsngew na ki arliang mamla, ka la rai ba u Syiem jong ka Hima Khyrim un ïasyllok bad ki Bakhraw jong ka Raid Nongkrem ha kaba ïadei bad ka rta jong ki nongjied kiba lah ban ïashim bynta ha ka elekshon ban jied ïa u Sordar jong ka Shnat Raid Tynring bad ka elekshon ban jied ïa u Sordar Shnat Raid Tynring yn pynlong katkum ki kyndon jong ka Section 19 jong ka KHAD(Nomination, Succession and Election of Syiem, Deputy Syiem, Lyngskor, Bakhraw, Sordar Shnat Raid, Longsan Mansan Shnat Raid, Rangboh Shnong or Sordar Shnong and Administration of Khyrim Syiemship) Act 2024 bad ban phah ïa ka kaiphod sha ka ophis hapoh shi bnai.”
Da ka jingkyrpad jong u nongujor u Wordington Nongrum, ka Single Bench ba la khlieh da u Justice HS Thangkhiew ha ka jingpynmih hukum ka la ong, ‘namarkata, haba peit ïa kane ka jingjia kaba dang shen, halor ka kyrpad jong ki ar liang manla, ïa kane ka kam la pynkut noh.”
