Shillong, Nailar, 05: Ka Meghalaya Human Rights Commission (MHRC) ka la pynkut noh ïa ka mukotduma ba la ujor pyrshah ïa u Superintendent of Police (SP) barim ka East Khasi Hills District u Rituraj Ravi hadien ba la shem ba kam shym la don kano kano ka jingpynkheiñ ïa ka hok longbriew manbriew pyrshah ïa ka Kong Bindas Syiem haba ka dang pynlong ïa ka jingïakhih shah thngan ha u snem baladep.
Ka Commission ka la shem ba ki sakhi sabut na ki nongsakhi kim ïahap satia ha ka jingjia bad ki jingkynnoh pyrshah ïa u Ravi kim shym la lah ban pynshisha.
“Kumta, namarba ym shym la don kano kano ka jingpynkheiñ ïa ka hok longbriew manbriew pyrshah pyrshah ïa u nongshah mudui u Rituraj Ravi kumta la pynkut noh ïa ka mukotduma,” la ong ka Commission ha ka hukum kaba la pynmih ha ka 25 tarik, Naitung.
Ïa ka mukotduma la mudui da u Enlang Sawian, da kaba kynnoh ba ha ka 9tarik Jylliew, 2024, ka kynhun ki Pulit kiba kieng atiar bha hapoh ka jingïalam u Ravi ki la pyrshang ban pynkynriah jubor ïa ka Kong Syiem na ka jingshong shah thngan khlem don lang ka ophisar Pulit kynthei lane u Executive Magistrate.
Ha ka 13 tarik, Jylliew, 2024, ar tylli ki jingujor la mudui, kawei, da u President bad u Vice President ka Hynniewtrep Integrated Organisation (HITO) ha kaba ki la kyrpad ban leh eiei pyrshah ïa u SP, East Khasi Hills halor ka jingkynnoh ba u la pyrshang ban pynkynriah jubor ïa ka Kong Bindas Syiem na ka jaka shah thngan hajan ka Secretariat hadien ba ka la ïakhih da kaba shah thngan halor ka jingpynslem ban maramot ïa ka surok Nongpoh-Umden.
Sa kawei pat ka jingujor ka dei kaba la ai lang da ka Kong Purity Phawa bad ka Kong Marylis Mawrie.
Ïa kine ki jingujor la shimkhia da ka Commission bad la register kum ka MHRC case No 29/2024 bad No. 30/2024.
Namarba kine ki ar tylli ki jingujor ki ïadei bad kajuh ka sobjek kum ka mukotduma MHRC no 28/2024, la pynmih ïa ka hukum ba ïa kine ki mukotduma yn shim mar kylliang bad ka mukotduma MHRC no 28/2024.
Ka Commission ka la shimkhia ïa ki jingujor bad phah notis sha ka Director General of Police, Meghalaya bad la bthah ïa u Ravi ban leit hajir hakhmat ka Commission.
U Bah Enlang Sawian (na ka HYC) u nongmudui ha ka mukotduma MHRC no 28/2024, u Donbok Dkhar bad u Shaniah Nongrum (na ka HITO), ki nongmudui ha ka mukotduma MHRC no 29/2024 kim shym la leit mih satia hakhmat ka Commission watla ïa ka kopi jong ki hukum ba la ai da ka Commission la phah sha ki haba don ka jingbishar.
Ki nongujor ha kine ki mukotduma ba la kdew kim shym la shim khia lymne kim shym la wan shakhmat kum ki nongsakhi na ka bynta ka Kong Bindas.
Ka hukum ka ong: “U CW2 Kyrmen Uriah bad CW3 Purity Phawa ha ki jingpynshisha jong ki ki la pynpaw ba ka jingleh jong u Superintendent ka long kaba pynkhein ïa ka riti synshar bad ïa ka hok longbriew manbriew ba kongsan jong ka kong Bindas Syiem kum ka riewkynthei bad dei ban pynshitom ïa u katkum ka kyndon jong ka aiñ.”
Hadien ba la bishar bniah ïa ki sakhi kiba don ha ka rekod, ka Commission ka la lap ba ki jingkren jong ki sakhi kynthup ïa ka Kong Bindas Syiem kim long kiba ïahap bad kiba lah ban pdiang.
Ka Commission ka la kdew ba kiwei pat ki briew kiba don ryngkat bad ka Kong Syiem ha ka miet ba la jia ka jingjia kim shym la pyni kum ki sakhi, bad ïa ka video clip jong katei ka jingjia ruh ym shym la pyni.
Ka Commission ka la pynkut ba kam don satia kano kano ka jingpynkheiñ ïa ka hok longbriew manbriew da u Rani bad ïa ka mukotduma la pynkut noh.
Hynrei ka Commission ka la ai jingmut ba ka Director General of Police ka lah ban bishar bniah ïa ka jingjia baroh bad ban ai ïa ki jingbthah kiba donkam na ka bynta ban kdew ïa ki ophisar hadien habud ha kaba ïadei bad kum kine ki jingjia.
“Hynrei, ha ka jingïaid lynti jong ka jingbishar ïa ka mukotduma, ka Commission ka la sngewdei ba ïa ka jingjia/jingkhihwin lah ban kiar jin lada u Superintendent of Police u la don ryngkat bad u Magistrate/Medical Officer. Kumta, ka DGP ka lah ban bishar bniah ïa ka jingjia baroh kawei bad ban ai ïa ki jingbthah kiba donkam na ka bynta ki ophisar haba ki ïatakhuh ïa kum kine ki khep hadien habud,” la pynpaw ka Commission ha ka hukum.
