Shillong, Nailur, 30: Ka Sorkar Jylla ka la rai ban pynkut noh ïa ka jingïaknieh jaka da kaba aiti palat 128 akar ka jaka ha Saitsohpen, Sohra Civil Sub-Division sha ka Elaka Saitsohpen.
Haba pyntip ïa kane hadien ba la pynïaid ïa ka jingïalang kynhun myntri ha ka sngi Baar, u Myntri Rangbah ka Jylla Conrad K.Sangma u la ong ba ka kynhun myntri ka la mynjur ïa ka jingai jingmut jong ka Committee ba la khlieh da u Symbud Myntri Rangbah Bah Prestone Tynsong, kaba la ïakren sngewthuh jingmut bad ki kynhun bapher bapher la palat shi snem shi teng ban wad ïa ka lad kaba pynkut noh ïa ka jingeh shi junom.
“Kumba 128 akar ka jaka yn aiti sha ka Elaka, katba kaba sah kan ïai sah ha ka General Administration Department (GAD) bad ka Sorkar Jylla,” u la ong haba ïakren bad ki lad pathai khubor.
Kane ka jingïa kajia ka sdang naduh ka por jong ka la long naduh ka por ba dang synshar ki Phareng, ha kaba ka Elaka ka la kam ïa ka jinglong trai halor ka jaka da kaba pynshong nongrim ïa ki rekod bad ka jingshong shnong.
“Ki don ki katto katne ki jaka kiba la shna iing da ki nongshong shnong bad ha ka Elaka baroh kawei la bun phew snem wat shwa ban ïoh ïa ka jylla bad ha ka jingshisha kiba bun na ki naduh ka por jong ki Phareng. Kumta da kaba pynshong nongrim ïa kine ki rekod baroh ka la don ka jingïakren bad ka Elaka bad ngi la poi sha ka jingïasngewthuh jingmut…,” ong u Sangma.
“Da kane ka rai, kane ka jingïa kajia kaba la slem hapdeng ka Elaka bad ka tnat GAD nga kyrmen ba kan kut noh. Tang shu mynjur ka kynhun myntri, yn sa ïasoi ïa ka soskular bad ki kynhun bad ban ïaid shakmat na ka bynta ban pynkut noh shi junom ïa ka jingïa kajia kaba la slem bha,” la ong shuh shuh u Sangma.
