Shillong, Nailar, 01: Uwei u rangbah uba la tip kyrteng kum u John Bosco Shadap uba la don 45 snem ka rta u la pynkut noh ïa la ka jong ka jingim ha u tyllai phasi ha kamra sum ha kawei ka iingshongwai ha ka shnong Mawblei, Block-C Shillong.
Katkum ka jingïathuh jong ki bahaing hasem, hadien ba ki la wad ïa u namarba u la jah naduh ka sngi Baar ka 29 tarik, Naitung, 2025 ki la lap pynban ha ka 1 tarik, Nailar, 2025 ha ka por kumba 2:30 baje noh sngi ba u la sdien phasi ïalade ha kane ka iingsah wai.
Ka hymmen jong une u rangbah ka la ïathuh ba ka kurim bad ki khun jong u ki dei kiuba sah sha ka shnong Sohra katba ma u pat u dei uba shu wan trei bylla katba ïoh shane sha nongbah Shillong.
Tang shu ïoh jingtip halor kane ka jingjia, ki Pulit ka Madanriting Police Station ki la leit mar mar ban pynlong ïa ka jingtohkit kaba bniah.
Ki bahaing ki la kyrpad ruh ïa ki bor ka aiñ ban pyllait noh na ka jingleh Postmortem namarba ka met ka la lam pyut khnang ban ïoh pyndep noh lashai ka sngi Saitjaiñ ïa ka jinglehniam bakhatduh.
