Shillong, Rymphang, 24: Ha ka jingpynbna result kaba pynkyndit lut ïa baroh, ka Voice of the People Party (VPP) kaba dang pynïakhun ha ka sien banyngkong eh ïa ki kyrtong ha ka elekshon sha ka Khasi Hills Autonomous District Council 2025, ka la lah ban jop haduh lai tylli ki Seat napdeng ki san tylli ki Constituency ha Ribhoi District, katba ka National Peoples Party (NPP) kaba dei ruh ka party kaba bat ïa u lakam synshar hapoh ka jylla ka la lah ban jop tang ar seat.
Ki kyrtong jong ka VPP kiba la ïohrah ïa ka namjop ki long na Mawhati, na Umsning bad na Umroi, katba ka NPP ka la jop ha Nongpoh bad ha Jirang.
Ha Jirang u Bah Sosthenes Sohtun uba dei ruh u Sitting MLA jong ka NPP u la jop da kaba ïoh khur 13,822 hajar vote, katba u Bah Victor Rani uba dei u Sitting MDC u la ïoh tang 5,990 vote.
Ha Nongpoh, ka Kong Rona Khymdeit kaba dei ka kyrtong jong ka NPP ka la ïoh khur 11,306 vote da kaba pynliem ïa u Sitting MDC uba ïakhun na ka UDP.
Ha Mawhati, u kyrtong ka VPP u Kynjohlang Rangthong u la pynliem lut ïa ki nongïakhun pyrshah da kaba ïoh 11,592 vote. Ha Umroi u Kyrtong jong ka VPP u Bah Isynei Hinge uba la ïoh khur 9,937 vote u la pynliem lyndang ïa u Sitting MDC Bah Rangkynsai Kharbuki uba dei ruh u kyrtong ka NPP.
Katba ha Umsning, ka Kong Macdalyne Sawkmie Mawlong kaba dei ruh ka Sitting MDC kaba ïakhun na tiket jong ka NPP ka la shah pynliem ha u kyrtong ka VPP u Bah Banrikus Nongsteng uba la ïoh khur 10,530 vote.
