Shillong, K’lyngkot, 18: Ka Khun Hynñiewtrep National Awakening Movement (KHNAM) ha ka sngi Saitjaiñ ka la dawa ïa ka Sorkar Jylla ban pynkynriah beit ïa ki Harijan kiba sah ha them Ïew Mawlong sha ki Quarter jong ka Sorkar namarba bun na kine ki dei kiba shakri bad kiba trei hapoh ka ophis jong ka Shillong Municipal Board (SMB) bad ha ki katto katne ki tnat treikam ka Sorkar Jylla.
Ha ka jingïakren bad ki lad pathai khubor u President jong ka KHNAM u Bah Thomas Passah u la ong ba ka jingdon jong kine ki briew ha Them Ïew Mawlong ka buh jingma ïa ki nongleit nongwan bad ki jingjia ba sngewsih kin nang ïai jia bad kin ym jah daleilei hi ruh.
“Ngi ïohi ba ka jingkwah jong kine ki briew kiba sah beaiñ ha Them Ïew Mawlong ban sah ha ki jaka kiba marjan bad ka jaka (sah ba mynta) ka pynpaw shai kdar ba leseh kim don jingmut ban mih na kato ka jaka,” la kynnoh u President ka KHNAM.
U la ong, ka jingthmu ban pynkynriah ïa ki Harijan ka long ba ki sah be-ain bad ba ki pynkhapngiah ïa ka ïew. Kato ka jaka ka dei ka jaka ïew bad ka jingdon ki iing briew ka wanrah ïa ki jingeh bad ki jingsniew kiba bun kiba ngi la lap la bun bun snem.
“Ka jingkwah jong kine ki briew ka long ban ïoh jaka sah ha Lum Survey kaba don hajan ka jaka kaba ki sah mynta hi. Lada pynkynriah ïa ki sha ka jaka sah jong ki shipai ka jingkhapngiah kan long kumjuh namarba kam pat jngai than haduh katta katta. Kine ki jingeh ba ki paidbah ki ïakynduh baroh shikatta na ka jingdon jong kine ki briew kan nang ïai don bad kan ym jah hi ruh,” la kynthoh u Bah Passah.
“Kine ki dei ki briew kiba trei ha ki tnat sorkar bapher bapher bad kham bun ki dei kiba trei hapoh ka Shillong Municipal Board (SMB) khlem jingartatien da kano kano ka lynti lah dei ban pynkynriah beit ïa ki sha ki Quarter jong ka Sorkar kiba la don lypa,” u la bynrap.
“Man ka por haba ïakren ki la mih beit ki mawjynthud kiba thymmai ha kane ka kam kaba wanrah ïa ka jingsngewdiaw ïa ngi bad ïa kiba bun balang. Lada ka Sorkar Meghalaya ka ïakren bad ka Ministry of Defence ban ai jaka kaei pat ba ka Sorkar Meghalaya kan hap ai bujli ïa ka Ministry of Defence. Kumba ka paw, ka Ministry of Defence kan ym ai ei ïa ka jaka khlem da don ka jingïohnong. Kine ki jingïapynbeit ngi sheptieng ïoh ba ka poi sha kano kano kaba kham khraw ïa ngi ki trai ri trai muluk,” ula ong bad bynrap shuh shuh, “ka Sorkar ka dei ban pynïaid noh shaid shaid shakhmat ïa kane ka kam bad kam dei than ban shu pynjem bad ban shu sngap kumba ka la leh na ka por sha ka por. Namarba kane kan nang aibor ïa kine ki briew ban ym mih na Them Ïew Mawlong.”
U la pynpaw ruh ba ka jingkwah jong ki Harijan ban dang ïai sah hajan ka Them Ïewmawlong ka pynpaw ba ki don ka jingïohnong na ka jaka ba ki sah mynta ha Them Ïew Mawlong. “Kim kwah ban duh ïa ka kamai bad kaba paw shai kdar ki dei ki dukan ba ki seng ha shilynter ka surok Them Ïewmawlong,” u la bynrap.
“Ngi la leit sha ka District Council bad ngi la aiti da ka jingthoh ba ki dukan kiba don ha Them Ïew Mawlong ki dei ki bym don ïa ka Trading License na ka District Council. Ngi la dawa ba ka District Council ka dei ban khang khyrdep ïa kine ki dukan namarba ki pynkheiñ ïa ka Trading by Non-tribal Regulation 1954. Ngi sngewsih ba wat ka District Council kam don jingsngewkhia ban leit sha kine ki dukan kiba shu buh be-aiñ,” la kynthoh u Bah Passah.
Haba kylli, u la ong, ka jingkwah jong ka KHNAM ka long ban pynjngai ïa ki Harijan na Them Ïewmawlong khnang ban lait na ki jingeh.
Haba kynthoh ïa ka jingjem shaba palat ka Sorkar u President jong ka KHNAM u la ong ba kane ka pynlong wat ïa ki briew kiba nabar ki nud ban wan tuklar wat ïa ka kam iing kam sem.
“Ka Sorkar ka dei ban leh katkum ka lynti khnang ba kan ym pynslem shuh ïa kane ka kam,” u la ong.
Shuh shuh u la ong ba kane ka ishu kaba naduh u snem 2018 ka Sorkar ka dei ban pynstet noh mardor kumba u paidbah hi u la thrang khnang ban pynkut noh shi syndon ïa kane ka mat.
