Shillong, Nailar, 06: Ka Iingbishar Meghalaya High Court, ka la pynjlan ïa ka por ban shim bishar ïa ka writ petition sha ka 25tarik Nailar, na ka bynta ban pynmih ïa ki hukum kiba kongsan kiba ïadei bad ka jingïakajia halor ka jingïaid Yatra.
Ïa ka jingujor, la mudui da ka Yatra pyrshah ïa ka Sorkar Meghalaya bad ïa ki phra ngut kiwei pat, da kaba kyntu ban pynbeit ïa ki jingeh kiba ïadei bad ka jingpynlong ïa ka jingïaid riewblei.
Ka Division Bench jong ka Iingbishar Meghalaya High Court kham mynshwa ka la bthah ïa ki arliang mamla ba kin pyrshang ban ïapynbeit ïa kane ka kam da ka jingïasuk lyngba ka jingïakren ïasngewthuh jingmut ha ka PIL No. 3 jong u snem 2025.
Kane ka PIL ka kynthup ïa ka jingïakajia ha kaba ïadei bad u maw ba la ngeit ba u dei u “Shiva Linga” uba don ha krem Mawjymbuin, Mawsynram, ïa uba la ñiew ba u long kyntang ha ka rukom ngeit niam.
Ka Bench kaba la khlieh da u Justice HS Thangkhiew ha ka hukum kaba la pynmih ha ka sngi Baar ka la kdew ba u nongmudui ha ka PIL No. 3 jong u snem 2025, uba la pynrung mynta kum u nongmudui No. 9 ha ka writ petition, um shym la wan mih satia ha ka por ba la shim bishar.
“Hynrei namar ka jingbym don jong u nongujor dalade, la buh sngi ïa kane ka kam ha ka 25 tarik u Nailar, 2025 na ka bynta ban pynmih ïa ki hukum kiba kham bniah,” la ong ka Bench.
“Ha kaba ïadei bad ka jingpynrung ïa ki dkhot jong ka Committee ban pyntyllun shuh shuh ïa ka kam shakhmat, yn sa pynmih ïa ki hukum kiba donkam ha ki tarik ban sa wan,” la bynrap ka Bench.
