Shillong, Nailur 09: Ka Sorkar Jylla ka la pynlut palat T.2.93 klur ïa ka jingsiew pisa sha ki 34 ngut ki nongïasaid aiñ jong ka Sorkar kiba la shah pynrung kyrteng ban leit ïasaid na ka bynta ka Sorkar hakhmat ka Ïingbishar Supreme Court ha u snem ba la dep.
Ki don 243 tylli ki mukotduma kiba dang sah pongding ha Ïingbishar Supreme Court ha kaba ka Jylla ka dei ka mamla.
Ha ka jubab ba la wanrah hapoh ka Iingdorbar ha ka sngi Baar, ka Myntri kaba khmih ïa ka tnat Aiñ ka Dr. Ampareen Lyngdoh ka la ong ba 34 ngut ki nongïasaid aiñ ka Sorkar ki la shah thung ban leit ïasaid hakhmat ka Ïingbishar Supreme Court na ka bynta ka Jylla Meghalaya.
Na kine, 6 ngut ki Nongsaid aiñ ki don ha ka thup ban leit ïasaid hakhmat ka Ïingbishar Supreme Court.
Ka la ong ba haduh mynta ka jingsiew ïa ka pisa sha u Advocate General bad ïa u nongïasaid aiñ jong ka Sorkar ha ka ïingbishar Supreme Court la leh katkum ka Notification 11 tarik, Risaw, 2018 bad ka 7 tarik, Rymphang, 2019.
“Na ka bynta ka jingpynshai, ka jingkheiñ kyllum ïa ki jingsiew pisa bad ki hok ba la ïohpdiang da u Advocate General bad ki nongïasaid aiñ ba la pynrung kyrteng da ka Sorkar Meghalaya ha ka ïingbishar Supreme Court na ka bynta u snem mang tyngka 2024-25 ka long T.2,93,12,350,” bynrap shuh shuh ka Dr. Ampareen.
