Shillong, Naiwieng 06: Ka Sorkar Jylla ka la pynlut T.9.28 klur tang ha East Khasi Hills District ban sumar ïa ki shynrang bad ki kynthei kiba la im kyrni ha u drok.
Na kane ka pisa kaba T.9.28 klur la pynlut na ka bynta ban sumar ïa ki 3184 ngut ki shynrang bad 32 ngut ki kynthei ha Shillong. Kane ka jingpynlut ïa ka pisa ka long naduh u snem 2010 haduh u snem 2023.
Katkum ka jingïathuh jong u nongwad RTI Bah Disparsing Rani ha ka Lah Sngi u Blei hadien ba la ïoh pdiang ïa ka jubab RTI na ka tnat Social Weflare ha ka 6 tarik u bnai ba ladep, u la ïathuh ba haba pan jubab halor ka jingpynlong ïa ki jingpynshai paidbah, ka tnat ka la ai jubab ba kam don satia.
“Kaba lyngngoh ban ïohi na kane ka kaiphod ka long ba ki nongdih drok ki don tang lai hajar tam katba ka jingpynlut pisa na ka bynta kine ki lai hajar tam ban sumar bad ban pynthied dawai ka long kaba kyndit ban tip namar ba ka poi haduh T.9,28,90,556 klur,” u la ong.
Na kane ka pisa, ka sorkar ka la pynlut T. 30,07,815 ha u snem 2010, T. 34,05,817 ha u snem 2011, T. 38,61,060 ha u snem 2012, T. 40,76,240 ha u snem 2013, T. 53,80,721 ha u snem 2014, T. 39,43,617 ha u snem 2015, T. 35,42,816 ha u snem 2016, T. 36,37,821 ha u snem 2017, T. 30,17,307 ha u snem 2018, T. 72,71,227 ha u snem 2019, T. 84,73,371 ha u snem 2020, T. 1,48,57,688 ha u snem 2021, T. 1,94,69,467 ha u snem 2022 bad T. 89,45,589 ha u snem2023.
“Ka long kaei kaei kaba pynkyndit ïa ka jylla, ïa ki riewpeitngor, ïa ki dorbar shnong, ïa ki sengbhalang bad ïa nga u nongtrei mon sngewbha ban tip ba ki nongdih drok ki don tang lai hajar tam hynrei ka pisa na ka bynta khatlai snem ka jingpynlut ka long haduh T. 9.28 klur. Uta u dei u dak jingkylli uba eh haduh katta ban ong ba na ka bynta ki nongdih drok kiba tang katta, ka pisa yn pynlut haduh katne,” u la ong.
“Lada don ki nongdih drok tang shi lak ngut, ka pisa jong nga jong phi ka la leit lut sha ki nongdih drok (ban ai jingsumar). Ngan sa pan jubab shuh shuh ha kaba ïadei bad ka rukom pynlut (ïa ka pisa na ka bynta ban sumar ïa kiba dih drok),” u la ong.
Haba kylli halor ka pisa, u Bah Disparsing ula ïathuh ba ka kaiphod ka khlem kdew la pynlut kumno ïa ka pisa hynrei la shu pynpaw beit ba ka pisa kaba T. 9.28 klur la pynlut na ka bynta kiba la kyrni ban dih ïa u drok naduh u snem 2010 haduh u snem 2023.
