Shillong, Naitung, 23: U Myntri Rangbah ka Jylla Conrad K. Sangma ha ka sngi Balang u la pyllait paidbah ar tylli ki kot bala thoh ha ka ktien Phareng ïa kiba la ai kyrteng, “His Story: Trailblazing Men of Meghalaya” bad “His Footprints in Time: Meghalaya’s Trailblazers and the Making of Modern India” ha ka jingïalang kaba kyrpang ha ophis treikam jong u ha Secretariat, Shillong.
Ïa kine ki ar tylli ki kot la pynwandur bad pynbeit sani bha da u Secretary jong ka Centre for Historical Research (CFHR) ka Synod College, Shillong u Dr. David Arnold Kharchandy.
Ha ka jingïalang la sakhi lang da u President jong ka Governing Body u Rev. E. R. Kharkrang, ka Principal jong ka kolej ka Dr. G. Lyngdoh, ki nonghikai bad ki nongtrei ophis na ka kolej.
Ka kot His Story: Trailblazing Men of Meghalaya, ka dei ka kot ba ai la kyrshan da ka jingai jingïarap ba kyrpang jong u Myntri Rangbah ka Jylla. Ka pyni ïa ki jingthoh shaphang ka jingim jong ki laiphew hynniew ngut ki shynrang kiba kyrpang kiba la ai ki jingnoh synniang kiba thymmai ha ki bynta bapher bapher kum ka saiñ pyrthei, ka pule puthi, ka niam, ka jingshakri paidbah, ka jingïakhih na ka bynta ka mariang, ka kam shipai, bad ki kam shna jingshna. Lyngba ki dur bad ki jingïathuhkhana kiba lah ban ïoh, ka kot ka long kum ka jaka buh jingthoh kaba paw bad kaba ai mynsiem ïa ka jingïaid lynti jong ka Meghalaya ha kane ka juk mynta.
Ka kot His Footprints in Time: Meghalaya’s Trailblazers and the Making of Modern India, ka dei ka kot ba la lum lang ïa ki laiphew san tylli ki jingthoh jong ki riewstad kiba wad bniah ïa ka jingim bad ki pateng jong ki briew shimet kiba ka jingtrei jong ki ka la pynwan dur ïa ki jingïathuhkhana ha ka thaiñ bad ha ka ri hi baroh kawei.
Ka kot ka kynthup ïa ki jingthoh shaphang ki nongkrad lynti kum u Purno A. Sangma, u Prof. G. G. Swell, u Rev. J.J.M. U Nichols-Roy, u Captaiñ Clifford K. Nongrum, u Neil Nongkynrih, u Rev. Dr. Amos C. Moore bad kiwei kiwei.
Ka kot ka shim na ki tyllong khubor ba la buh lypa, ki histori ba la kren da ka ktien, bad ki jingwad bniah ha ka lyngkha ban pyni ïa ka dur kaba bniah jong ka jingnoh synñiang jong ka Meghalaya sha ka jinglong ba mynta jong ka India.
Haba kren ha kane ka jingïalang, u Myntri Rangbah ka Jylla u la ïaroh ïa ka Centre for Historical Research Synod College halor ka jingshimkhia jong ki ban buh jingthoh ïa ka pateng jong ki nongkrad lynti jong ka jylla. U la ban jur ïa ka jingdonkam ban pynneh pynsah ïa kum kine ki histori kum ka tynrai jong ka jingithuh bad jingai mynsiem, khamtam ïa ki samla jong ka jylla Meghalaya.
Baroh ar tylli ki kot ki ieng kum ki mawjam ha ka jingpule bad ki spah jong ka kolshor, kiba pynskhem biang ïa ka jingaiti jong ka Synod College ïa ka histori paidbah bad ka jingpynneh pynsah ïa ki jingïathuhkhana jong ka thaiñ.
La khmih lynti ba kin long kum ki lad jingïarap kiba kongsan na ka bynta ki samla pule, ki nongwad bniah, ki nongthaw polisi, bad ki paidbah kumjuh.
