Shillong, Naiwieng, 30: Ka Sorkar Meghalaya ka la pynmih ïa ka Standard Operating Procedure (SOP) kaba pyrkhing ban tah iit iong, ban pyndait siren, ban pyndait ïa ki beacon, bad ki name plates ha ki kali Sorkar.
Katkum ka SOP, tang ki kali ba hap ha ka kyrdan “’Z-Plus’ bad ‘Z’ ba la mynjur da ka komiti jong ka Sorkar ki lah ban tah iit iong na ka bynta ka jingshngaiñ.
Ïa ki Siren lah ban pyndonkam tang da ki Pulit, ki kali Fire and Emerency Service bad Ambulance, bad ki kali VVIP/VIP.
Katkum ka jingpynbna jong ka tnat Transports, la mana ban pyndait ïa ki Beacon ne ki ki light rong saw kiba don ne ki bym don ïa ki Flasher.
Ka SOP ka batai ruh ïa ki kyndon na ka bynta ki Name plate ha ki kali bad ki Flag Rod na ka bynta ka jingpyndonkam ïa ka lama lai rong jong ka ri.
Katkum ka paragraph 3.44 jong ka Flag Code of India 2002 (katkum ba la pynbeit thymmai) la shah tang ïa kine ki kynrem ki lyndan ban pynher ïa ka Lama lai rong jong ka ri ha ki kali: u President, u Vice President, ki Lat bad ki Lieutenant Governor, ki Head of Mission/Posts, u Myntri Rangbahduh, ki Myntri Sorkar, ki Myntri Khynnah, ki Deputy jong ki Union, ki Myntri Rangbah bad ki Myntri Sorkar jong ka jylla lane ki Union Territory, u Lamphang jong ka Lok Sabha, u Chairman jong ka Legislatives Councils ha ka jylla, ki Lamphang jong ki Legislative Council ha ki jylla, ki Lamphang jong ki Legislative Assembly ha ki jylla bad ki Union Territory, u Deputy Chairman jong ki Legislative Council ha ki jylla, ki Deputy Speakers jong ki Legislative Assembly ha ki jylla bad ki Union Territory, u Chief Justice of India, ki Judge jong ka iingbishar Supreme Court, u Chief Justice jong ki High Court bad ki Judge jong ki High Court.
“Kane ka SOP kan treikam na ka bynta ka jingpyndonkam ïa ki kali ka Sorkar Meghalaya na ki kam Sorkar, lait noh ïa ki kali Emergency Service kumba la batai hapoh ka Motor Vehicles Act, 1988 (hadien ba la pynbeit thymmai). Kane ka OM kan treikam noh mardor,” la ong u Commissioner & Diengdoh Secretary Bah CVD Diengdoh.
Ka SOP ka long katkum ki rai jong ka iingbishar Supreme Court bad ka Motor Vehicles Act, 1988 (katkum ba la pynbeit thymmai).
