Shillong, Naitung 19: U Myntri Rangbah ka jylla u Conrad K Sangma ha ka sngi Thohdieng u la pynthikna ba ka jingthoh kyrteng ne registration ïa ki nongbylla nabar jylla yn leh ha ka rukom kaba dei hynrei u la banjur ba yn pynshitom pat ïa kito kiba donkti ban pynkheiñ ïa ka aiñ da kaba talasi ïa ki kot ki sla ha kylleng ki jaka. Kumba long haduh mynta ki la don haduh 10 ki case ne mutkotduma ba la ujor pyrshah ïa ki seng bad ki riew shimet kiba donkti ha kine ki kam bad kiba pynkheiñ ïa ka aiñ.
Hadien ka jingïalang bad ki nongmihkhmat ka seng Khasi Students’ Union (KSU), u Sangma u la ong ba ka sorkar ka dang khmih bniah na baroh ki liang ïa ki jingtyrwa bad ai jingmut da ka union.
Lah ban ong ba ka KSU ka la pynjur ka jingkhynra ïa ki nongbylla bar jylla kum ka dak jingpynpaw pyrshah ïa ka jingbym lah ban pyntreikam ka sorkar ïa ki aiñ ba kynthup ïa ka Meghalaya Residents’ Safety and Security Act (MRSSA), 2016 bad ka Inner Line Permit (ILP) ha ka jylla.
“Ka la don ka jingpynbna kaba nga la ong ba ki riew shimet bad ki seng kiba la pynpaw kaba la pyndonkam ka kyntien ‘work permit’ hynrei hadien la pynshai ba ka ktien ‘work permit’ ka phai ne pyndonkam ha ka Inter-State Migrant Workers Act. Kumta ka kyntien work permit ka mut ka jingpyntreikam ïa ka Inter-State Migrant Workmen Act, ka bym don ki kyndon na ka bynta ka work permit hynrei ka don ki kyndon ban register ïa ki nongbylla da ki contractor ne kiba ai kam lada ki don 5 ngut ne bun ïa kane kiba mut ban wan sha ka jylla lyngba ka aiñ bad ban register,” u la ong.
U la ong ba ha kaba khatduh kaei kaba kongsan kadei ka jingsngewkhia shaphang ki kyndon bad ki aiñ kiba wan kiba dei ban pyntreikam lyngba ki kot ki sla la ka dei kaba shu talasi ne ka jingpynithuh bad kiwei ki kam,” u la bynrap.
Halor ka jingpynbna ka KSU ban pynkhlaiñ ka jingkhynra ïa ki kot ki sla tat haduh ba ka sorkar ka la long kaba la khreh ban pyntreikam ïa ki aiñ, u Myntri Rangbah ka jylla u la ong ym don mano mano ba don hok ban pynlong ki jingtalasi.
“Hynnin ka sngi ruh ha Sohra ki pulit ki la khang ïa kane ka jingleit khynra. Kumta ka kam jong ngi kadei ban pynthikna ba dei ban pyntreikam ïa ka aiñ bad lada hangno hangno kine ki jia ka aiñ kan ïaid la ka jong ka bynta bad lada mano mano kiba pynkheiñ ïa ka aiñ, ka aiñ hi kan sa leh ïa kaba donkam,” ong u Sangma.
