Shillong, ‘Naitung, 29: Ki dkhot jong ka Hynniewtrep Youths Council (HYC) South West Khasi Hills District Unit hapoh ka jingïalam jong u President u samla Pynskhem kharjahrin uba dei ruh ha kajuh ka por u nongïasaid Aiñ bad u General Secretary u samla Wallam Nongsiej ki la ïakynduh ïa u Superintendent of Police jong ka South West Khasi Hills District Unit ban buddien ha kaba ïadei bad kawei ka jingjia shah leh beijot ïa iwei i heprit ba dang 13 snem ka rta da u Kpanah bar jylla ha kawei na ki shnong kaba hap hapoh ka South West Khasi Hills District.
Kawei pat ka dei ka jingjia ka dei ka jingshah leh beijot bad shah pynïap jong iwei i heprit ba dang 12 snem ha u snem 2021 ïa kaba la suba ba kiba donkti ki dei kiba la tip kyrteng kum u Modu Sangma bad u Ratan Das.
Ha kaba ïadei bad kine ki ar tylli ki case ki Pulit ki la ïohkem ïa ki nongleh kam bymman bad la pynngat ïa ki ha ki kyndon aiñ bapher bapher jong ka POCSO Act.
Na ka liang jong ka seng ka la kyntu ïa u SP ban kham pynkloi ban pynngat kyndon ïa ki nongleh kam bymman bad ban pynthikna ba ki dei ban ngat ruh ha ka jingshah pynsajia.
