Shillong, Lber, 17: Ki runar ki bym lah satia ban ithuh durkhmat ki la rung jubor hapoh ka phyllaw ïing jong u Bah Wanlambha Kharkongor bad rong tuh ïa ka tape na ka kali kaba pynieng ha phyllaw ïing jong u ha Madanriting, Block-C kaba don hajan ka iingmane Presbyterian, Shillong.
Katkum ka ejahar ba u Bah Wanlambha u la mudui sha ki Pulit ka Madanriting Police Station, u la pyntip ba ha ka 16 tarik mynta u bnai ha ka por kumba 5:00 baje janmiet u la set ïa ka kali ka Chevrolet Beat LT kaba don ïa u registration number ML05-H 6508 hapoh ka phyllaw ïing sah jong u. Dei ha ka por mynstep 17 tarik mynta u bnai u Bah Wanlambha u la lap ba ki runar ki la rong tuh ïa ka tape kaba shongdor T. 9 hajar eiei bad uwei u Pen Drive jong ka ophis da kaba pyndonkam ban loit da u Screwdriver rong jyrngam uba ki runar ki la iehnoh syndon hapoh ka Seat jong ka kali.
Nalorkata, la lap ruh ba ki runar ki la ïoh prong shapoh jong ka kali da kaba shu pynpait ïa ka iit kaba don shadien jong ka kali.
