Shillong, Nailar, 17: Ka Khasi Students Union (KSU) South West Khasi Hills District Unit ka la pynphai ktien kylla ïa u Syiem ka Hima Maharam u Pa’iem Niandro Syiemiong ba balei um ai ai rep ïa ki khun ki hajar jong ka Hima haba ki dang bun ki jaka kiba lait ei hapoh u pud u sam jong ka Hima ban ïa kaba die duh sha ka tnat shipai Border Security Force (BSF), Meghalaya Frontier.
Ha u kyrwoh, u President ka seng u samla Forwardman Nongrem u la ong, , “kum ka seng kaba ju peitngor ïa ki jingjia kiba wan lynshop ïa ka jaitbynriew, ngi la leit ban aiti da ka jingthoh ban pyrshah ïa ka jingthmu ba ladep plan lypa da u Syiem bad ki katto katne ki Myntri ban die jaka sha ki shipai BSF ka ban kot sha 70 acre bad ka KSU ka pynshai paidbah kdar ba ka seng kam lah ban ap haduh ba “U Syiem un da ladep die” hynrei ngi pyrshah namar shwa ba u Syiem un leh ïa kata ka seng ka la dep ïoh jingtip ïa ka jingthmu jong u.”
“Katkum ka jingpynshai jong u Syiem kata ha ka 15 tarik, Nailar, 2025 ba um pat rai ban hangno ban ai, hynrei ki la tyrwa bun tylli ki jaka ba ki shipai kin jied, ka dei kajuh ka kam kaba ka KSU, ka sngewthuh ba u Syiem u mut, kaba la pynlong ïa ka seng ba kan pynpaw paidbah ba kan pyrshah,” la ong u samla Nongrem.
“Ka jingkynnoh ïa ka seng ba kam tip ïa ki jingshisha, ka dei kajuh ka jingshisha ba u Syiem u la thmu ban pynkohnguh ïa ki katto katne ki Myntri bad ban pynbiej paidbah da ki jingtyrwa ne ki jingïapeiñ ki bym shongnia ïano ïano ruh,” la kynnoh ka seng.
“Ka jingshisha kaba paw hi ka long ban die ïa ki jaka ka Hima da ki phew akar ban pynmyntoi ïa u Syiem shimet bad ïa ki katto katne ngut, hynrei ki ban mad ïa ki jingeh ki jingshah pynwit bad jingshah pynthud kan long ïa ki “Khun – ki hajar” ha ki kam ki jam bad ha ka rep ka riang jong kiba mynta bad kiban dang wan pateng la pateng. Ka jingkam uwei u Myntri ba kim dei ki myndie ri namarba kim pat rai ïa kano ka jaka ban die, ka dei ka jingshisha namar ïa mynta ki dang ïa tyrwa, ïa ka jaka bad ki dang ïa khlieh dor bad kin sa die hadien kumba une u Myntri u la pynshai hi ha ki lad pathai khubor ha ka 15 tarik, Nailar, 2025 ryngkat bad u Syiem,” la ong shuh shuh u President ka KSU SWKHDU.
Ka KSU ka kren da kaba shai ba lada u Syiem um pat rai ne u la dep rai, ka seng ka ieng pyrshah ïa jingthmu jong u Syiem bad katto katne ki Myntri jong u bad kan ïai long kaba peitngor bad kan ïeng pyrshah, la ka long da kino kino ki lynti.
Ka seng ka kynthoh ruh ïa ka jingkam u syiem ban siew bailutksan sha ki nongrep ba ka dei ka jingpyrshang ban pynbiej bad ïalam bakla ha kaba kum ka seng kan nym lah ban pdiang ïa kane.
“Ka jingong ba ki mut ai jaka ban ïohkam ïohjam ki samla ka dei ka kamkai kaba ngin ym lah ban pdiang da leilei ruh em namarba haei ngi ïohi ba kiba bun ki Khasi ki ïohkam ïohjam ha Upper Shillong, 7mer ne kiwei ki jaka shipai ha ka jylla jong ngi,” la kynthoh ka Seng.
Ka seng ka pynbna paitbah ruh ba kan ïaid beit ïa ka jingïalang paitbah ha Photkroh ha ka 20 tarik mynta u bnai, kata ha ka sngi Balang ha ka por 10:30 baje mynstep bad ha kato ka sngi yn sa shim ïa ka rai kumno ban leh nangne shakhmat.
