Shillong, Nailur, 01: Ki nongïaid nongieng kiba ïaid lynti na Jail Road sha Khyndai Lad ynda poi hajan ka Payal Cinema ki la lyngngoh bad kyndit ban ïohi ïa ki dkhot ka Bharatiya Janata Party, Meghalaya State Unit kiba rah ïa ki plakad bad kiba pyrta ïa ki pynrem hakhmat ka ophis treikam jong ka Congress Bhavan.
Ka jingrah plakad ka BJP hakhmat ka ophis treikam jong ka Seng Congress ka long ban pynrem jur ïa ka Congress hadien ba ki katto katne ki nongïalam ka Congress ki la kren bein ym tang ïa u Myntri Rangbahduh ka ri u Narendra Modi hynrei wat ïa ka kmie jong u kaba la khladnoh na kane ka sla pyrthei ha ka jingpynlong u Rahul Gandhi ïa ka jingïaid paidbah ha ka jylla Bihar dang shen.
La sakhi ruh katba ki dkhot ka BJP ki dang ieng ban pyrta ïa ki sur pynrem ki dkhot ka Congress ruh ki la pynphai nia na phalor pyrshah ïa ki dkhot ka BJP.
U nongïalam ka Meghalaya Pradesh Congress Committee (MPCC) u Bah Manuel Badwar ha ka jingïakren bad ki lad pathai khubor u la ka pynrem jur ïa ka jingïakhih jong ka Bharatiya Janata Party shabar jong ka Congress Bhavan ha Shillong halor ka jingïakynad ba la shna thok ha kaba ïadei bad ka jingkren jong u Rahul Gandhi ha ka ‘Vote Adhikar Yatra’ ha Bihar.
Ka MPCC ka kyntait mardor ïa ka jingkynnoh ba khlem nongrim da ka BJP ba u Rahul Gandhi u la kren pynjah burom ïa ka kmie ba la khladnoh jong u Myntri Rangbahduh ka ri.
“Kane ka dei ka buit jong ka BJP kaba la tip bha, kaba pynpaw ïa ki jingshisha, ki buhrieh ha lyndet jong ka jingsngew. Haba kim lah ban jubab na ka bynta ka jingbym donkam donjam, ka jingkiew dor bad ki elekshon ba leh thok, ki pyndonkam da ka jingsngewsih bad ka niam ban buhrieh ïa ki jingshisha,” u Bah Badwar.
